Squid Games தொடரில் ஒரு காட்சி வருகிறது. பிக்பாஸ் வீட்டைப் போன்று ஒரு இடத்தில் நூற்றுக்கணக்கானோரை சிறைவைத்து அவர்களை நாளொன்று ஒரு ஆபத்தான விளையாட்டில் பங்கேற்க செய்கிறார்கள். ஒருநாள் மதிய உணவுக்கு ஒரே ஒரு முட்டையே கொடுக்கிறார்கள். பங்கேற்பாளர்களுக்கு பசி தாள முடியாமல் போகிறது. ஒருவர் முட்டைக்காக இன்னொருவரை அடித்துக் கொன்று விடுகிறார். உடனே இறந்தவருக்கு போக வேண்டிய பரிசுத்தொகையும் இறுதி வெற்றியாளருக்கான மொத்த பரிசுத்தொகையுடன் போய் சேர்வதைக் காட்டுகிறார்கள். ஒரு உயிர் போய் விட்டதே என பதறியவர்களை அதனால் தமக்கு வரப் போகும் பெரும்பணம் அதிகமாகக் கூடும் எனும் எண்ணம் அப்பதற்றத்தை நீக்கி மகிழ்ச்சியடைய வைக்கிறது. அதன் பிறகு அங்கு பணி செய்யும் காவலாளி ஒருவர் உணவை மிகக்குறைவாக அளிப்பதற்கான காரணத்தை சொல்லுகிறார்: உணவு இல்லாமல் ஆகும் போது, பக்கத்து தட்டில் உள்ளதை பிடுங்கியாவது சாப்பிட வேண்டும் என ஆசை ஏற்படும் போது, இனி இப்படித்தான் சாப்பிட்டாக வேண்டுமோ என பயம் வரும் போது, பக்கத்தில் இருப்பவன் செத்தால் தனக்கு கூடுதல் உணவும், அதிக பரிசுத்தொகையும் கிடைக்குமே என நம்பிக்கை வரும் போது பங்கேற்பாளர்களுக்குள் பகைமை வளர்ந்து சண்டை ஏற்படும், அவர்கள் பரஸ்பரம் அடித்துக் கொள்ள, எளியோர் அழிந்து வலியோர் மட்டும் பிழைப்பர். “இன்று இரவு அவர்கள் பசியில் பரஸ்பரம் அடித்துக் கொண்டு சாகப்போகிறார்கள்” என அந்த காவலாளி சொல்லுகிறார். அப்படியே நடக்கவும் செய்கிறது.
பிக்பாஸ் வீட்டுக்குள்ளும் ரேஷன் படி அளந்தே உணவு தரப்படுகிறது என அறிவோம். ப்ரியங்கா தான் முன்பு தட்டு நிறைய வழித்து வழித்து தின்றவள், இப்போது ரெண்டே சப்பாத்தியில் திருப்தி அடைய வேண்டி இருக்கிறதே என அங்கலாய்ப்பதைக் கேட்டேன். இதற்கு முந்தைய பருவங்களிலும் உணவுப்பற்றாக்குறை அங்குள்ளோரின் எரிச்சலை அதிகப்படுத்தி சண்டையை வளர்ப்பதை கண்டிருக்கிறோம். உ.தா., மலையாள பிக்பாஸ் மூன்றாவது பருவத்தில் யார் அதிகமாக தேநீர் அருந்துகிறார்கள், அதனால் தேயிலை தூள், பால் குறைகின்றன என்பதை வைத்து பெரிய மோதல்கள் நிகழ்ந்தன, குழந்தைத்தனமான குற்றச்சாட்டுகள் வைக்கப்பட்டன. பிக்பாஸில் பசிக்கும் வெறுப்புக்குமான தொடர்பை நான் Squid Games பார்த்த பின்னரே சரிவர விளங்கிக் கொண்டேன்.
டயட், விரதம் இருப்பவர்களுக்கு இது தெரியும் - உணவு குறைய குறைய நம் கோபம் அதிகமாகும். ஒருமாதிரி எரிச்சல் நம் நரம்புகளில் சதா பற்றி எரியும். சட்டென யாராவது சீண்டினாலும் கத்தி கூச்சலிட்டு பிரச்சனை பண்ணத் தோன்றும். பசியுடன் இருக்கையில் நிறைய பேர் சூழ வாழ்வது சிரமம். பிக்பாஸ் நிர்வாகத்தினர் உணவு ரேஷனை ஒரு சவால் என்று சொல்லி நியாயப்படுத்தினாலும் அவர்களுடைய நோக்கம் வேறு.
Squid Gamesஇன் ஒரு மென்மையான வடிவமே பிக்பாஸ்.
Comments