தொப்பை ரகசியம்

 எப்படீங்க தொப்பையை குறைக்கிறது என ஒரு நண்பர் கேட்டார். எனக்கும் தெரியவில்லை. சொல்லப் போனால் யாருக்கும் தெரியாது. அறிவியல் என்ன சொல்லுகிறதென்றால் வயிற்றில் திரளும் கொழுப்பானது எடை குறைப்பின் போது கடைசியில் தான் போகும். அது உண்டியல் காசு, தங்கம் போல. ரொம்ப தேவைப்பட்டால் தான் உடைப்போம், அடகு வைப்போம் என்பது உடலின் முடிவு. அதனால் தனியாக வயிற்றுக்கு பயிற்சி செய்வது பெரிதாக உதவாது. எடை குறைய குறைய உடலின் வடிவம் மாறிக்கொண்டே வருவதைப் பார்ப்போம். எங்கு முதலில் கொழுப்பு சேர்ந்ததே அதுவே கடைசியாகப் போகும் என அறிஞர்கள் சொல்கிறார்கள். அதாவது எடையேற்றமும் எடைகுறைப்பும் ஒன்றுக்கு மற்றொன்று தலைகீழாக நடக்கும். அதனால் பொறுமை அவசியம் - ஹீரோ அடியாட்களில் ஒவ்வொருவராக அடித்து வீழ்த்திவிட்டு வில்லனிடம் வருவதைப் போல நாம் கடைசியில் தொப்பையிடம் வந்து "வாடா இப்போ" என சொல்வோம். ஒரு விளையாட்டு என நினைத்தால் அது ஜாலியாக இருக்கும்.

நான் என்ன செய்தேன் என்று கேட்டால் இரண்டு விசயங்களை சொல்வேன். இது அனேகமாக எல்லாருக்கும் உதவும்:
1) ஒருவேளை தான் உணவு - 18 மணிநேர உண்ணாநோன்பு.
2) விரதத்தை இரண்டு ஸ்பூன் நெய் சாப்பிட்டு முடிப்பது. அடுத்து இரவுணவுக்கு காய்கறி - புரோட்டீன் + நல்ல கொழுப்பு - மாவுச்சத்து ஆகியவற்றை 60-30-10 எனும் விகிதப்படி சாப்பிட்டேன். ஒரு பெரிய குவளை நிறைய வேகவைத்த காய்கறி என்றால் சிறிய கிண்ணத்தில் வேக வைத்த சிக்கன் / மீன் / இரண்டு மூன்று முட்டைகள் போன்ற உணவு. கூடவே கொஞ்சம் சீஸ் அல்லது ஒரு ஸ்பூன் வெண்ணெய். அடுத்து மற்றொரு சிறிய கிண்ணத்தில் வேகவைத்து நொதிக்க வைக்கப்பட்ட சிறுதானிய உணவு. கூடவே தயிர். ஒருநாள் சிறுதானியம் வேண்டாம் என்றால் 150 கிராம் சர்க்கரை வள்ளிக்கிழங்கு. வாரம் மூன்று நாட்கள் இப்படி எனில் அடுத்த 3-4 நாட்கள் இந்த மாவுச்சத்தை தவிர்த்து விட்டு புரதத்தை அதிகமாக எடுத்துக் கொள்வது (150 கிராம் சிக்கன் / 200 கிராம் மீன் / ஐந்து முட்டைகள்). கூடவே தயிரையும் அதிகமாக்குவது. இது ஒரு சமச்சீரான உணவு. இதில் உடம்புக்கு தேவையான புரதம், காய்கறியில் இருந்து கிடைக்கும் சத்துக்கள், நார்ச்சத்து, நல்ல கொழுப்பு, கொஞ்சம் மாவுச்சத்து, நொதித்த உணவில் இருந்து நல்ல கிருமிகள் என ஏராளமான பயன்கள் உள்ளன. முக்கியமாக சாப்பிடும் போது ரத்தத்தில் சர்க்கரை ஏகத்துக்கு எகிறாது. இதற்கும் சர்க்கரை நோய்க்கும் சம்மந்தம் இல்லை. இயல்புடல் கொண்டவர்களுக்கும் 70% மாவுச்சத்து + 30% புரோட்டீன் என சாப்பிடும் போது ரத்தத்தில் சர்க்கரை அதிகமாகும். (பின் இன்சுலில் சுரந்து அடங்கும்). இது உடலில் வீக்கத்தை ஏற்படுத்துகிறது. இன்னொரு பக்கம் பெருங்குடலில் உள்ள நல்ல கிருமிகளும் இறந்து போகின்றன. இதெல்லாம் சேர்ந்தே நம் உடலை காங்கிரஸ் கட்சியைப் போல ஆக்கி விடுகிறது.