இஷான் கிஷனின் மட்டையாட்டத்தை கடந்த ஓராண்டாக கவனித்தால் ஒரு முக்கியமான பலவீனம் தெரியும். அவர் அனேகமாக எல்லா பந்துகளையும் off பக்கமாக விரட்ட, தூக்கி அடிக்க விரும்புகிறார். அதற்காக பந்து வெளிப்பட்டதும் middle and off க்கு அவரது முன்னங்கால் நகர்ந்து விடுகிறது. பந்து வீச்சாளர்கள் அவருக்கு வீசும் பந்தின் திசையை off குச்சியில் இருந்து உள்ளே வருவதாக வைத்துள்ளார்கள். இதனால் மற்ற இடதுகையாளர்கள் நேராகவோ மிட் விக்கெட்டுக்கோ அடிக்கக் கூடிய பந்துகளை கிஷனால் சுத்தமாக அடிக்க முடிவதில்லை, cramp ஆகி விடுகிறார். ரன்கள் வராமல் அவர் தடுமாற ஆரம்பிக்க ஒரு கட்டத்தில் ரிதம் போய் விடுகிறது. விளைவாக அவுட் ஆகிறார்.
இதை சரி செய்ய அவர் பந்தின் திசைக்கு ஏற்ப காலாட்டத்தை கொள்ள வேண்டும். முன்முடிவுடன் குச்சிகளுக்கு குறுக்காக எல்லா பந்துகளுக்கும் நகர்வதை நிறுத்த வேண்டும். சில ஆண்டுகளுக்கு முன்பு ஷிக்கர் தவனுக்கு இதே பிரச்சனை இருந்தது. தவன் பின்னர் வலதுகாலை லெக் ஸ்டம்பில் வைத்து இடம் பண்ணிக் கொண்டு நேராக வரும் பந்துகளை கால் பக்கமாக மிட்விக்கெட், லாங் ஆனில் பவுண்டரிகள் அடிக்கத் தொடங்கினார். அத்துடன் பவுலர்கள் அவரை மிடில் ஆண்ட் லெக் திசையில் போட்டு கடுப்பேற்றுவதை நிறுத்தினார்கள்.
சில பத்தாண்டுகளுக்கு முன்பு off பக்கத்தின் கடவுளான சவுரவ் கங்குலிக்கு இதே போலொரு பிரச்சனை இருந்தது. அவர் பயிற்சி செய்து அழகாக on drive ஆடி அந்த குறையை சரி செய்தார்.
இஷான் கிஷனும் இதில் இருந்து பாடம் கற்றுக் கொள்வார் என நம்புவோம். என்ன விசித்திரம் எனில் இஷான் இந்திய அணிக்குள் வரும் முன்பு மிட் விக்கெட், லாங் ஆன் பகுதிகளில் ஒரு கையை விட்டு பெரிய சிக்ஸர்களை விளாசுபவராக இருந்தார். இந்திய அணியில் நிலைபெறத் தொடங்கியதும் வீட்டுக்குத் திரும்பும் வழியை மறந்த அல்செமர்ஸ் வந்த தாத்தாவைப் போல் ஆகி விட்டார்.
கருத்துகள்