நாளை இந்தியா நியுசிலாந்து அரை இறுதிப் போட்டி. தலைவிதியைத் தீர்மானிக்கும் நெருக்கடியான போட்டிகளில் இந்தியா “இதயம்” முரளி போல திக்கித்திக்கி நிற்குமா அல்லது எம்.ஜி.ஆர் போல சரோஜா தேவியை இடுப்பிலேயே வளைத்துப் பிடிக்குமா என்பதை நாளைப் பார்க்கலாம். எம்.ஜி.ஆர் என்றால் இறுதிப்போட்டியை அந்த வேகத்திலே போய் அடித்துவிடுவார்கள் என்பதில் எனக்கு ஐயமில்லை. ஆஸ்திரேலியா நிச்சயமாக இறுதிப்போட்டியில் இந்தியாவை ஆதரிக்கும் பெரும் மக்கள் திரளுக்கு முன் கடும் அழுத்தத்தில் ஆடும். சொதப்பும். ஆக, நாளைய போட்டி உலகக்கோப்பை 2023ஐ ஆஸ்திரேலியா வெல்வதற்கான அதிர்ஷ்டம் எந்தளவுக்கு உள்ளது என்பதைக் காட்டும். மற்றபடி உளவியல் நெருக்கடிக்கு அப்பால் நியுசிலாந்து ஒரு குழந்தைப்பாப்பா அணி என உறுதியாக நம்புகிறேன். ஹீராவோ பீராவோ, காதல் கண்றாவி, அழுகை எல்லாம் வேண்டாம், வாடா அடிப்போம் என இந்தியா இறங்கினால் நியுசிலாந்தை ஊதித் தள்ளிவிடுவார்கள். நாளை களமிறங்குவது முரளியா எம்.ஜி.ஆரா என்பதே முக்கியமான கேள்வி.
நியுசிலாந்திடம் பந்துவீச்சில் விக்கெட் எடுக்க ஆளில்லை. அதுவும் நல்ல ஆடுதளத்தில் அவர்களுக்கு வேகமோ ஸ்விங்கோ சுழலோ இல்லை. முழுக்க மட்டையாட்டத்தையும் களத்தடுப்பையும் நம்பியிருக்கும் அணி அது. அவர்களுடைய பெரிய அனுகூலம் ஜெயித்தாக வேண்டும் எனும் நெருக்கடியை எடுத்துக்கொள்ள மாட்டார்கள். ஒருபோதும். அதனாலே நியுசிலாந்து வீரர்கள் சென்னை சூப்பர் கிங்ஸில் தோனிக்கு நல்ல பொருத்தமாக அமைகிறார்கள். அவர்கள் தோனி வகையறா. அப்படியே கூல் ஸ்டோரேஜிலே பிறந்து அப்படியே ஜில்லென்று வந்து நிற்பவர்கள்.
சரி, ஆட்டச்சூழலுக்கு வருவோம். ஆட்டம் மும்பையின் வான்கடே மைதானத்தில் நடக்கிறது. நல்ல பவுன்ஸும் வேகமும் இருக்கும். தரமான மட்டையாட்ட ஆடுதளம். தொட்டால் பறக்கும். ஷமியை விட பும்ராவும் சிராஜும் நன்றாக வீசுவார்கள். ஜடேஜாவுக்கு பந்து திரும்பாது. ஆனால் குல்தீப்புக்கு அந்த பவுன்ஸ் உதவக் கூடும். மட்டையாட்டத்தில் ரோஹித்துக்கு வான்கடேவில் ஒருநாள் போட்டிகளில் மோசமான ஆட்டசாதனை வரலாறு உள்ளது. ஏனென்றால் வான்கடேவில் பந்துவீச்சாளர்களுக்கு கொஞ்சமாக ஸீம் அசைவு, பவுன்ஸ் கிடைக்கும். கம்பு சுற்றினால் ஸ்லிப்பில் கேட்ச் போகும். ரோஹித்துக்கு அது சொந்த ஊர் மண் என்றாலும் அவர் அதற்கு தயாராக இல்லை என்பது அதிசயம். அரை இறுதியில் அது மாறும் என நான் நம்பவில்லை. ஷ்ரேயாஸ் அந்த பவுன்ஸில் வரும் பெர்குஸனின் வேகப்பந்து பவுன்சரை எங்கே அடிப்பார்? அங்கு ஒரு பலவீனம் உள்ளது. அதனால் இரு மண்ணின் மைந்தர்களிடமும் நான் பெரிதாக எதிர்பார்க்கவில்லை. கில், கோலி, ராகுல், சூர்யா தான் என் குதிரைகள்.
இதுவரையிலான போட்டிகளில் அங்கு முதலில் மட்டையாடிய அணிகளே வென்றிருக்கிறார்கள். ஆறு மணிக்கு மேல் வேகப்பந்து ஸ்விங் ஆகிறது, எகிறுகிறது, 20 ஓவர்களுக்குப் பின் நன்றாக ஆடுகிறது. ஆனால் நிறைய அணிகள் இரண்டாவதாக மட்டையாடும் போது 20 ஓவர்களுக்குள் குறைபிரசவமாகி விடுகிறார்கள். அதனால் நாளை யார் டாஸ் வென்றாலும் முதலில் மட்டையாடப் பார்ப்பார்கள். நியுசிலாந்து எப்போதுமே இம்மாதிரி டாஸ், சீதோஷ்ண நிலை அதிர்ஷ்டத்தை நம்பியிருப்பார்கள். நாளை அவர்களுக்கு சாதகமாக எதாவது நடக்குமா எனப் பார்க்க வேண்டும். இல்லாவிட்டால் முதலில் இந்தியா மட்டையாடி பெரிய ஸ்கோர் அடிக்கும். இரண்டாவதாக மட்டையாடும் நியுசிலாந்தால் ஓரளவுக்கு நெருங்கி வரவும், நெருக்கடி கொடுக்கவும் முடியும். குறிப்பாக ரச்சின் சதம் அடித்தால். ஆனால் அவர்கள் முதலில் மட்டையாடி 300ஓ அதை ஒட்டியோ அடித்தால் போல்ட்டும் சௌதியும் மாலை நேரத்தில் வீசும் கடற்கரைக் காற்று, குளிர்ந்த காற்று ஆகியவற்றின் ஸிவிங்கை பயன்படுத்தி முதல் பத்து ஓவர்களில் 3-4 விக்கெட்டுகளை வீழ்த்த முயல்வார்கள். ஆட்டம் பரபரப்பாக இருக்கும். இந்தியா தன் முதல் போட்டியில் ஆஸ்திரேலிய வேகவீச்சாளர்களுக்கு எதிராக அனுபவித்த அதே நடுக்கத்தை, தடுமாற்றத்தை மீண்டும் அனுபவிப்பார்கள். யார் காப்பாற்றுவார்கள்?
கருத்துகள்