மகத்தான சல்லிப்பயல்

ஒரு எழுத்தாளனின் சுயம் என்பது அவர் எழுத்தில் உள்ளது மட்டும் அல்ல. அவர் எழுத்தில் உள்ள அக்கறைகளும் வாதைகளும் கட்டமைப்பவையாக கூட இருக்கலாம். போலியாக என்று சொல்லவில்லை. ஆனால் மொழிக்குள் மட்டும் செல்லுபடியாகும் உண்மைகளாய் அவை இருக்கலாம்.

பிரமிள் சு.ராவிடம் பணம் வாங்கி விட்டு பின் ஊரெல்லாம் தன்னிடம் சு.ரா கடன் வாங்கி விட்டு தர மறுக்கிறார் என் புகார் கூறித் திரிகிறார். இதை சு.ரா பிரமிள் பற்றின நூலில் எழுதி இருக்கிறார். ஆனால் பிரமிளின் கவிதைகளில் எங்காவது பணம் பற்றின கவலைகள் தெரியுமா? இல்லை. சதா பணம் பற்றின புலம்பல்களை விக்கிரமாதித்யனின் கவிதைகளில் காணலாம். ஆனால் அவரிடம் நேரடியான பழக்கத்தில் இந்த ஆவலாதிகள் வெளிப்படாது. இதில் எந்த அக்கறை உண்மையானது? இரண்டுமே தான்.

பிரமிள் ஒரே சமயம் வானில் பறப்பவராகவும் மண்ணில் ஊர்பவராகவும் இருந்திருக்கிறார். அவருடைய மனப்பிரச்சனை பணம் சார்ந்த complexஇல் இருந்து வருகிறது என சு.ராவோ நாமோ நினைக்கலாம். அது உண்மையாகவோ பாதி உண்மையாகவோ இருக்கலாம். ஆனால் பிரமிளை் கவிதைகள் மூலம் மட்டும் அறிந்தவர்களுக்கு அக்கூற்று ஏற்க முடியாததாய் இருக்கும்.

ஆத்மாநாமின் மனச்சிக்கல் புகழாசையினால் விளைந்தது என அழகிய சிங்கர் கூறியதையும் அதனால் ஆத்மாநாம் வாசகர்கள் காயப்பட்டு எதிர்வினையாற்றுவதையும் நான் இப்படித் தான் புரிந்து கொள்கிறேன். ஆத்மாநாமை கவிதை வழியாக மட்டுமே அறிந்த எனக்கும் கூடத் தான். என் மனதில் உள்ள சித்திரம் ஆத்மாநாம் இருத்தலிய சிக்கல்களினால் வாழ்வைத் தொலைத்தவர் என்பது. ஆனால் அது ஒரு பிம்பம் மட்டுமே தானே. கவிதைக்கு வெளியே அது உண்மையா என எனக்கு எப்படித் தெரியும்? ஒருவேளை எழுத்துக்கு வெளியே மற்றொரு ஆத்மாநாம் இருக்கலாமே.

ஒரு கவிதையையோ கூடப் பழகின மனிதரையோ தன் விருப்பப்படி அர்த்தப்படுத்த அனைவருக்கும் உரிமை உண்டு. ஏன ஆத்மாநாமின்் கண்ணாடிக் கவிதையை கருத்துவாதம் பற்றின கவிதையாக நான் புரிந்து கொள்ளும் போது அதை புகழ் எனும் கண்ணாடி பற்றினதாக ஏன் அழகியசிங்கர் விளங்கிக் கொள்ளக் கூடாது? அவர் கவிதையை வைத்து கவிஞனை புரிந்து கொள்ளலாம் அல்லது கவிஞனை வைத்து கவிதையை புரிந்து கொள்ளலாம். அது அவர் விருப்பம்.

தஸ்தாவஸ்கிக்கு தன் தந்தையை கொல்ல வேண்டும் எனும் இச்சை இருந்தது. அது குறித்த குழப்பங்களும் சிக்கல்களுமே அவரை கரமசோவ் சகோதரர்கள் நாவலை எழுத தூண்டியது என ஆய்வாளர்கள் கூறுகிறார்கள். இதற்கு என்ன ஆதாரம் உள்ளது? ஒன்றும் இல்லை. வெறும் ஊகம். ஆனால் அந்த ஊகம் தான் இந்த விளையாட்டை சுவாரஸ்யமாக்குகிறது.

ஆத்மாநாம் அற்ப விசயங்களுக்காகவும் அலைந்திருக்கக் கூடும் என்பதை ஏன் பரிசீலிக்கக் கூடாது? அவர் நம்மைப் போன்ற ஒருவர் தானே?
முன்பு அழகியசிங்கர் பிரமளின் ஒரு வெகுளித்தனமான அபத்தமான பரிமாணம் பற்றி இதே போல் எழுதினார். அதை ரசித்தேன். அவர் இது போல் முன்னாள் நட்சத்திரங்களை தொடர்ந்து எளிய நடைமுறைத் தளத்தில் வைத்து பார்க்க முயல்வது எனக்கு பிடித்திருக்கிறது.