நேற்றைய போட்டியில் (18 மே 2023) சன் ரைசர்ஸுக்கு எதிராக ஆர்.சி.பியின் மட்டையாட்டத்தை வெகுவாக ரசித்தேன். அடுத்த இரண்டு போட்டிகளிலும் இவ்வாறே ஆடி அவர்கள் இறுதிப்போட்டிக்கு போக வேண்டும், நடுவே choke ஆகக் கூடாது என்பதே என் விருப்பம். ஆர்.சி.பி போன்ற ஒரு அணி இறுதிப்போட்டிக்கு சென்றால் ஆட்டமே வண்ணமயமாகும்.
நேற்று நான் குறிப்பாக கோலியின் சதத்தை வெகுவாக ரசித்தேன். அவரது சிறந்த ஐ.பி.எல் இன்னிங்ஸ்களில் ஒன்றாக இது நிச்சயமாக வரும். அவர் அடித்த புல் ஷாட்டுகள், பிக் அப் ஷாட்டுகள் அவ்வளவு அழகாக இருந்தன. அண்மையில் தான் ரவி சாஸ்திரி கோலியும் ரோஹித்தும் இனி சர்வதேச டி20 போட்டிகளில் இருந்து ஒதுங்கிக் கொள்ள வேண்டும் என்று தன் பேட்டியில் சொன்னார். அது தலைவரை சீண்டி விட்டதோ என்னமோ, சன் ரைசர்ஸ் பந்துவீச்சை அழகியல்பூர்வமான ஒரு அறுவை சிகிச்சை பண்ணிவிட்டார். ஆடுதளம் ரொம்பவே சாதகமாக இருந்ததும் நிச்சயமாக உதவியது. பந்து சற்று நின்று வந்திருந்தாலோ அதிகமாக சுழலுக்கு திரும்பியிருந்தாலோ கோலி 40 ரன்களுக்கு மேல் தடவி இருப்பார். ஆனால் நேற்றைய போட்டி அவருக்கென்றே அமைக்கப்பட்டது. ஆடுதளத்தில் பந்து ஏதோ கையை வைத்தால் வாய்க்குள் அப்படியே போய்விடக் கூடிய பஞ்சு பஞ்சென்று செய்த இட்லியைப் போல இருந்தது.
ஆனால் கோலி பற்றி ரவி சாஸ்திரி சொன்ன கருத்து இப்போதும் சரியே - கோலி சம்பிரதாயமான ஷாட்களை மட்டும் ஆடுபவர் அல்ல, அவர் சம்பிரதாயமான முறைமையை பின்பற்றுகிறவர். குறிப்பிட்ட நீளத்தில் திசையில் விழுந்தால் குறிப்பிட்ட ஷாட்கள், அல்லாவிடில் ஒற்றை, இரட்டை ரன்கள். இந்த ஆட்ட முறைமை ஒரு பிரச்சினை.
இதைக்கொண்டே அவரால் 200 ஸ்டிரைக் ரேட்டை எட்ட முடியும். ஆனால் பந்து அதிகமாக எகிறினாலோ திரும்பினாலோ பந்து வீச்சாளர்களை அச்சுறுத்தும்படி intent காண்பிக்க கோலியால் முடியாது. அதற்கு சேவாக் பாணி மட்டையாளர் வேண்டும். இன்றைக்கு சொல்வதானால் சூர்யகுமார் போன்றவர்கள். இறங்கி வருவது, அங்கும் இங்கும் பெண்டுலம் போல நகர்ந்து நின்று விட்டு நேராக வரும் பந்தை fine leg, point, third man என அடிக்கத் தெரிய வேண்டும். வீச்சாளர்கள் உடனே சுதாரித்து பந்தை வைடாகவோ ஷார்க்காவோ வீசினால் அது மட்டையாளருக்கு சாதகமாகும். ஒவ்வொரு பந்துக்கும் ‘நான் உன்னை அடித்து துவைக்கப் போகிறேன்’ எனக் காட்ட வேண்டும், செய்ய வேண்டியதில்லை. பாவ்லா முக்கியம். அவ்வப்போது அடித்துக் காட்டவும் வேண்டும். நிலைகுலைய வைக்க வேண்டும். அல்லது தோனி, டேவிட், ஹெட்மையர் போல பவர் ஹிட்டராக இருக்க வேண்டும். இது இன்றைய டி20 மட்டையாட்டத்துக்கு மிக முக்கியம். இது கோலியிடம் இல்லை. அதனாலே அவர் இந்தியாவுக்காக இனி டி20 ஆடக் கூடாது என நினைக்கிறேன்.
அதே நேரம் நேற்று அவர் நிகழ்த்திய அந்த நுணுக்கமான அறுவை சிகிச்சையை வெகுவாக ரசித்தேன். நகப்பூச்சு அணிந்த நீண்ட விரல்களைக் கொண்ட ஒரு பெண் பூவின் இதழ்களை ஒவ்வொன்றாக பிய்த்தெறிவது போல எவ்வளவு அழகாக பீதியூட்டும்படி ஆடினார்!
Comments