இந்துத்துவாவின் விரோதிகள் உண்மையில் சிறுபான்மையினர் அல்லர். இந்துக்கள்தாம். தம்மை ஏற்காத இந்துக்களை மாற்றவே இந்துத்துவர்கள் ஒரு நூற்றாண்டுக்கு மேலாகப் போராடி வந்துள்ளனர் என்பதை வரலாற்றைப் பார்த்தால் புரியும். தமிழ்நாட்டில் பாஜக ஏன் கிறித்துவ, இஸ்லாமிய குருமார்களை, சின்னங்களைத் தாக்காமல் பெரியாரைத் தாக்குகிறது? அவர்கள் ஏன் இஸ்லாமிய தலைவர்களைக் கொல்லாமல் காந்தியைக் கொன்றார்கள்? இவைதான் முக்கியமான கேள்விகள். மோடியின் இதுவரையிலான பாராளுமன்ற உரைகளை, மேடைப் பேச்சுகளை கவனித்தால் இது புரியும். அவர்கள் மசூதியை இடித்தது இஸ்லாமியர்களைத் தாக்கவோ காயப்படுத்தவோ அல்ல. இந்துக்களை அச்சுறுத்தி தம் வசப்படுத்தவே. அவர்கள் கண்முன் இருந்த பெருந்திரளான இந்துத்துவா வழிப்படாத இந்துக்களை 'நெறிப்படுத்தவே'. அவர்கள் இதுவரையிலும் அர்பன் நக்சல்கள் என்று சிறையில் அடைத்தவர்கள் அதிகமும் இந்துக்களே. தொடர்ந்து அவர்கள் அதிகம் கவலைப்படுவதும் நிறுவனமயப்படாத இந்துக்களைக் குறித்தே.
இந்து மதத்தை கிறிஸ்துவமாகவும் இஸ்லாமாகவும் மாற்றுவதே இந்துத்துவத்தின் செயல்திட்டம். மற்றமையாக்குவது அல்ல என்பது என் பார்வை. அதாவது இந்து மதத்தை இந்துக்களிடம் இருந்தே அந்நியப்படுத்துவது. மதத்தை நிறுவனமாக்குவது - ஒற்றை நம்பிக்கை, ஒற்றைக் கடவுள், ஒற்றை வேதம்.
முருகன் திமுக கையில் தமிழ் தெய்வமாகவும், மக்களின் தெய்வமாகவும், உணர்வுரீதியாக அணுகக் கூடிய தெய்வமாகவும், இந்துத்துவர்களின் கையில் பெருமத உபதெய்வமாகவும் இருப்பான். திமுகவின் கையில் முருகன் தெய்வம், பாஜகவின் கையில் முருகன் மோடியின், அண்ணாமலையின் மற்றொரு அவதாரம். ரஜினி தொடர்ந்து தன்னை சிவனின், பாபாவின் அவதாரமாக காட்ட முயன்றதைப் போல தீவிர பக்தர்களான வேறு முன்னணி நடிகர்கள் செய்ததில்லை. தெய்வத்தை கருவியாக்குவது பக்தியல்ல. அது அரசியல். அதனாலே ரஜினியால் பாஜகவுடன் இசைவாகப் போக முடிந்தது.
இந்த இரண்டு போக்குகளுக்குமான வித்தியாசத்தை உணர்ந்திருப்பது அவசியம்!
மீண்டும் சொல்கிறேன், பாஜக ஒரு இந்து விரோதக் கட்சி. திமுகவையும் காங்கிரஸையும் இடதுசாரிகளையும் விட இந்துமதத்தை உள்ளிருந்து செல்லரித்து உருமாற்றுவது இந்துத்துவர்களே. வரலாறு கருணை காட்டாவிடில் அவர்கள் இந்துமத்தை கிறிஸ்துவம், இஸ்லாம் போன்ற முறைப்படுத்தப்பட்ட மதமாக்கி விடுவார்கள். அதாவது இம்மதங்களின் நகலாக இந்துமதத்தை மாற்றுவார்கள். அது கொடூரமாக இருக்கும்!
இந்துத்துவத்தால் இஸ்லாத்துக்கோ கிறிஸ்துக்கோ உண்மையில் ஆபத்து குறைவே!
கருத்துகள்