ஐ.பி.எல்லில் இரண்டு அற்புதங்கள்

ராஜஸ்தானுக்கும் ஹைதராபாதுக்கும் இடையிலான நேற்றைய ஐ.பி.எல் போட்டியில் என்ன ஆயிற்று, யார் வென்றார்கள் என்பதை விடுங்கள். அந்த கடைசி பந்து நோ பால் சந்தேகத்துக்குரியதா என்பதையும் விடுங்கள். என்னை அப்போட்டியில் வெகுவாக கவர்ந்தவர்கள் இருவர் - இருவருமே கால்சுழலர்கள்: ஒருவர் ஹைதராபாத் அணியின் ஆல்ரவுண்டர் விவ்ராந்த் ஷர்மா. மற்றவர் நமக்கு நன்கு தெரிந்த ரவிச்சந்திரன் அஷ்வின்.

விவ்ராந்த் ஜம்மூ காஷ்மீரை சேர்ந்த இளம் வீரர். விவ்ராந்தின் பந்துவீச்சு ஸ்டைல் தென்னாப்பிரிக்காவின் முந்தைய கால்சுழலர் போல் ஆடம்ஸையும் நம்மூர் பியுஷ் சாவ்லாவையும் கலந்ததைப் போல் இருக்கிறது. நேற்றைய போட்டியில் இவர் மார்க்கெண்டேவை விட நன்றாக தனக்கு அளிக்கப்பட்ட களத்தடுப்புக்கு ஏற்ப வீசினார். ஒரு அரைக்குழிப் பந்தை போட்டார் என்றாலும் அடிவாங்கியதும் கலங்காமல் திரும்பவும் தன் களத்துக்கு ஏற்ப ஆப் ஸ்டம்புக்கு வெளியில் தொடர்ந்து வீசினார். ஒரு கூக்ளி போடக் கூட முயலவில்லை. அது மட்டுமல்ல ஒரே நீளத்தில் - short of the length அல்லது length - இல் தொடர்ந்து வீசினார். ஒன்றிரண்டு முழுநீளப் பந்துகளை வீசுவோம் என்றெல்லாம் குழப்பவில்லை. எனக்கு இந்த தெளிவான அணுகுமுறை பிடித்திருந்தது. ஆள் குள்ளமென்றாலும் பந்து நன்றாக பவுன்ஸ் ஆகிறது. இவரது கூக்ளியும் சிறப்பானது என்பதை ஒரு உள்ளூர் போட்டியில் அவரது பந்துவீச்சை கவனிக்கையில் கண்டேன்.

விவ்ராந்த் ஒரு மேல் மத்திய வர்க்க குடும்பத்தை சேர்ந்தவர். இவரது அண்ணனும் ஒரு வேகப்பந்து வீச்சாளர். இவரது தந்தை ஒரு ரசாயன நிறுவனத்தை நடத்தி வந்தார். அவர் அண்மையில் இறந்த பின்னர் தனது அண்ணனே குடும்பத்தின் பொறுப்பை எடுத்து வேலை செய்து தன்னை கிரிக்கெட் ஆட ஊக்கப்படுத்தியதாக விவ்ராந்த் சொல்லி இருக்கிறார். ஐ.பி.எல் ஏலத்தின் போது 2.6 கோடிக்கு இவர் வாங்கப்பட்டது பலரையும் ஆச்சரியப்படுத்தியது. ஒரே நாளில் இவரது வாழ்க்கை மாறிவிட்டது. இவ்வளவு கவனம் இவருக்கு கிடைக்க ஒரு முக்கிய காரணம் அவர் ஒரு கால்சுழல் பந்துவீச்சு ஆல்ரவுண்டர் என்பது - இது ஒரு அரிய சேர்க்கையாகும். பெரும்பாலான மட்டையாளர்கள் ஆப் ஸ்பின் அல்லது இடதுகை ஸ்பின் போடுவார்கள். மிக மிக அரிதாகவே கால்சுழல் போடுவார்கள், அப்படி வீசினாலும் அதில் கட்டுப்பாடு இராது. கால்சுழல் ஆல்ரவுண்டர்களில் உலகம் முழுக்க பந்துவீச்சு ஆல்ரவுண்டர்களே அதிகம் - ஹசரங்காவைப் போல. ஒரு கால்சுழல் மட்டையாட்ட ஆல்ரவுண்டர் தனிச்சிறப்பான வரவாக இருப்பார். ஆல்ரவுண்டர்களில் மிதவேகப்பந்து வீசக் கூடியவர்களுக்கு அடுத்தபடியாக கால்சுழல் ஆல்ரவுண்டர்களுக்கு ஐ.பி.எல்லிலும் தேசிய போட்டிகளிலும் கணிசமான மதிப்பு கிடைக்கும். அவ்விதத்தில், இந்த விவ்ராந்த் தன் பந்துவீச்சில் மேலும் சற்று பயிற்சி எடுத்து மெருகேற்றினால், கூடவே தன் உடற்தகுதியை மேம்படுத்தினால் (சிறுவயது போட்டிகளில் ஆள் பார்க்க உருளைக்கிழங்கைப் போல இருக்கிறார் என்பதால் இவருக்கு இயல்பாகவே வலுவான உடலமைப்பு இல்லை என கணிக்கிறேன்) ஒருநாள் இந்திய அணிக்காக ஆடுவார் என கணிக்கிறேன்.

வரக்கூடிய போட்டிகளில் நான் விவ்ராந்தின் மட்டையாட்டத்தை ஊன்றி கவனிப்பேன்.

அடுத்து நம் அஷ்வின். நேற்றைய போட்டியில் அவர் வலதுகை மட்டையாளர்களுக்கும் இடதுகை மட்டையாளர்களுக்கும் பந்து உள்ளே வருவதைப் போல drift செய்து வெளியே கொண்டு போனதைப் பார்க்க அவ்வளவு அழகாக இருந்தது. அஷ்வின் ஐ.பி.எல் போட்டிக்குள் ஒரு தனி போட்டியாக, ஒரு தனி ஆட்டமாக தன் பந்துவீச்சை மாற்றக் கூடியவர். அவர் மட்டையாளரை எப்படி செட் செய்து தூக்குகிறார் என்பதைப் பார்க்க ஷேன் வார்ன் நினைவுக்கு வருவார். நேற்று அவர் அபிஷேக் ஷர்மாவை அவுட் செய்தது அப்படியான ஒரு கிளாசிக் தருணம். கடைசி ஓவரைக் கூட சந்தீப் ஷர்மாவுக்குப் பதில் அவர் - ஆப் பக்கத்தில் களத்தடுப்பாளர்களை அதிகமாக நிறுத்தி - floaterகளை வீசியிருந்தால் வென்றளித்திருப்பார் எனத் தோன்றுகிறது.