பாகிஸ்தான் ஆட்டச்சூழலை, ஆடுதளத்தை ரொம்ப மோசமாகக் கணித்துவிட்டார்கள் போல. வேகவீச்சாளர்களுக்குப் பந்து நன்றாக ஸீம் ஆகிறது. முதல் சில ஓவர்களிலாவது குறிப்பாக குறைநீளத்திலோ லெங்திலோ விழுந்தால் ஸீம் ஆகி உள்ளே வெளியே என்று சீறுகிறது. குத்திப் போட்டால் எகிறுகிறது - குறிப்பாக அந்த பஞ்சு போன்ற எகிறும் பந்து உயரத்தின் அளவுக்கு வேகம் கொண்டிருக்காது. அதைப் புல், ஹூக் அடிப்பது கடினம். அப்படித்தான் ஹர்த்திக் முதல் ஓவரிலும் விக்கெட் எடுத்தார். பும்ராவின் ஒரு விக்கெட்டும் அப்படித்தான் விழுந்தது. அவரது முதல் பந்தே விக்கெட் விழுந்திருக்க வேண்டும். ஆனால் அது எட்ஜ் வாங்கி சிக்ஸர் போனது. அப்போதே எனக்கு சயிம் குச்சிகளுக்குக் குறுக்கே போகிறார், பும்ரா யார்க்கர் வீசக் கூடும் எனத் தோன்றியது. அவ்வாறே அடுத்த பந்தில் நடந்தது. இதையெல்லாம் பார்த்தபோது பாகிஸ்தான் அணித்தலைவருக்கும் பயிற்சியாளருக்கும் தாம் செய்தது முட்டாள்தனம் எனத் தோன்றியிருக்க வேண்டும் - ஷகீன் அப்ரிதியைத் தூக்கிவிட்டு இரண்டு நல்ல வேகவீச்சாளர்களை ஆடியிருக்க வேண்டும். இந்த ஆடுதளத்தில் உள்ள உயரத்தை, ஸீம் அசைவைப் பயன்படுத்தியிருக்க வேண்டும். அதிகமான சுழலர்கள் (6 பேர்கள்) அவ்வப்போது ஓட்டங்களைக் குறைத்தார்கள், ஆனால் கொத்துக்கொத்தாக விக்கெட் எடுக்கவில்லை. அங்கேயே ஆட்டத்தைப் பறிகொடுத்து விட்டார்கள்.
கருத்துகள்