மலையாள ஹீரோக்கள் ஏன் சிகரெட் பிடிப்பதில்லை?
மலையாள சினிமாவில் சிகரெட் பிடிக்காத நாயகர்களைக் குறிப்பிட்டேன்; ஆனால் அங்கு அந்த இடத்தை பீடி பிடித்துள்ளது. அங்கு பீடி பிடிக்காத நாயகர்கள், குணச்சித்திர நடிகர்கள் இல்லை. மாறாக வில்லன்கள் சிகரெட் பிடிப்பார்கள். இந்த பீடி × சிகரெட் எதிரிடை அங்கு வர்க்க வேறுபாடைக் குறிக்கும் குறியீடு ஆனது. இதற்கு அங்கு வலுவாக தோன்றின மார்க்ஸிய கதையாடல் ஒரு காரணம். “பீடி உள்ளது, தீப்பெட்டி உண்டா?” எனும் கேள்வி மறைந்து வாழும் தோழர்கள் பரஸ்பரம் அடையாளம் காண்பதற்கான ஒரு சமிக்ஞையாக பல இடதுசாரிப் படங்களில் வரும். இடதுசாரிகளை நேரடியாய் சித்தரிக்காத, விளிம்புநிலையினர் குறித்த படங்கள் அங்கு எண்பதுகள் தொட்டே வருகின்றன. இப்படங்களிலும் நாயகனின் முரட்டு கலகத்தன்மையை சுட்டுவதற்கு பீடி பயன்படுகிறது.
வேறெந்த மொழிகளையும் விட மலையாள சினிமாவிலே நாயகியின் அருகில் நின்று அலட்சியமாய் பீடி புகைக்கும் நாயகர்கள் வருவார்கள். பீடிப் புகை அப்பெண்ணின் முகத்தை சூழ்ந்து கலைகையில் நாயகனின் ஆண்மை மூர்க்கமடைந்து அவளை கலைத்து ஆக்கிரமிக்கும் குறியீடு காட்சிப்படுகிறது. ஒரு சாதாரண காதல் காட்சியில் பின்னணியில் இப்படியான ஒரு செக்ஸுவல் தொனியை அளிக்க புகை பயன்படுவது மலையாள சினிமாவின் சுவாரஸ்யங்களில் ஒன்று. நாயகனை அந்தளவு முரடனாய் காட்ட வேண்டாம் என இயக்குநர் நினைத்தால் நாயகி வரும் போது பீடியை கீழே இட்டு அணைப்பவனாய் நாயகன் வருவான்.
இங்கு ஒரு முக்கியமான கேள்வி வருகிறது: ஏன் மலையாள படங்களில் பீடி தோன்றுமளவுக்கு தமிழில் சிகரெட் தோன்றவில்லை? ஏன் சிகரெட்டுக்கு பீடியின் “சமூக அங்கீகாரம்” கிடைக்கவில்லை? இதற்கு இடதுசாரி அரசியல் காரணமாய் மலையாள சினிமாவில் அடித்தள மக்கள் பிரதானமாவதும், கேரள சமூகத்தில் பீடி அடித்தள மக்களின் ஒரு அன்றாட அடையாளமாக பார்க்கப்படுவதும் காரணம். அங்குள்ள அபூர்வ அரசியல் பண்பாட்டு சூழ்நிலை காரணமாய், பீடி புகைப்பது ஒரு சமூக ஒழுங்கு மற்றும் மரபு மீறலாக அல்ல ஒருவித அரசியல் பண்பாட்டுக் கலகமாய் அர்த்தம் பெறுகிறது.
தமிழ் ஹீரோயின்களும் சிகரெட்டும்
ரெண்டாயிரத்தின் துவக்கம் வரை, நம் தமிழ் சினிமாவில் பெண்கள் சிகரெட் புகைப்பது ஒரு சுட்டித்தனமான கலக விளையாட்டாக காட்டப்பட்டு வந்தது. நாயகி தன் தோழிகளுடன் சிகரெட் பிடிக்க முயன்று சிரமப்பட்டு இரும அதை நாயகன் கண்டு பிடித்து அவளை சீண்டுவதும் அந்த சீண்டலின் மூலம் அவளை அவன் நெருங்குவதும் இப்படங்களில் வரும் ஒரு டெம்பிளேட். “அக்னி நட்சத்திரத்தில்” அமலா சிகரெட் பிடிக்க முயன்று பிரபுவிடம் மாட்டுவதாய் ஒரு “ரொமாண்டிக்” காட்சி வரும். “எம். குமரன் சன் ஆப் மகாலட்சுமியிலும்” இதே போல அசினை ஜெயம் ரவி சிகரெட்டை வைத்து சீண்டி அடக்கும் காட்சி வரும். ஏன் இப்பெண்கள் மட்டும் சிகரெட் பிடித்தார்கள்? சிகரெட் பிடிக்கும் பெண்ணின் இயல்பாக நம் சினிமா எதைக் காட்டுகிறது?
பொதுவாக சற்றே விடலைத்தனமும் சுட்டியும் வேடிக்கை சுபாவமும் விளையாட்டுத் துணிச்சலும் கொண்ட பெண்கள் பாலியல் கவர்ச்சி மிக்கவர்கள். குறிப்பாய், ஆண்மை செருக்கு கொண்ட நாயகனுக்கு இத்தகைய பெண்கள் பொருத்தமாய் இருப்பார்கள். “இதயம்” படத்தில் வாயில்லா பூச்சியான முரளிக்கு நாயகியாக வரும் ஹீரா சிகரெட் புகைத்தால் அது அவள் மீது வெறுப்பு உண்டாக்கும்படியாய் இருக்கும் அல்லது நாயகனின் ஆண்மையை வெகுவாய் மட்டுப்படுத்துவதாய் மாறும். ஆனால் ஏற்கனவே அடக்கி ஆளும் இயல்பும் உடல் வலுவும் கொண்டவனாய் இருக்கும் பாக்ஸரும் போலீஸ் அதிகாரியுமான “அக்னி நட்சத்திரம்” பிரபுவுக்கு அவனைப் போன்றே துணிச்சலும் துறுதுறுப்பும் மிக்க ஒரு நாயகியை அடக்குவதே சவால். அங்கு வன்முறையும் பாலியலும் கைகோர்க்கிறது. காதலும் ஒரு சண்டைக்காட்சி போல ஆக அதற்கு கிக் கூடுகிறது. “எம். குமரனிலும்” இதுவே நிலை. ஆக, இத்தகைய சிகரெட் பிடிக்கும் பெண்கள் ஆணை ஆதிக்கமிக்கவனாய் கூடுதலாய் காட்டவும், காதல் காட்சிகளில் கிளர்ச்சியை கூட்டவும் உதவினர்.
ஆனால் இந்த டெம்பிளேட் சமீபத்தைய படங்களில் வெகுவாய் மறைந்து விட்டது. இன்று “ராஜா ராணி” போன்ற படங்களில் அமலா போன்ற ஆதிக்க சுபாவம் கொண்ட நாயகி “இதயம்” முரளி போன்ற பிள்ளைப்பூச்சி நாயகர்களை நேசிப்பது அதிகம் வருகிறது. நாயகனை நாயகி மிரட்டுவதும் ஓட விடுவதுமே இன்றைய டெம்பிளேட். சமீபத்தில் வெளிவந்த “பியார் பிரேமா காதல்”, “96” போன்ற படங்களிலும் ஆதிக்கம் செலுத்தும் நாயகிகளே மக்களால் ரசிக்கப்படுகிறார்கள்; அப்பிராணி நாயகனே கைத்தட்டு பெறுகிறான். அதே நேரம், இப்பெண்கள் ஒரு ஆணுடன் இரவில் ஒரே அறையில் தங்குவது, குடிபோதையில் உடலுறவு கொள்வது வரை காண்பிக்கப்பட்டாலும் சிகரெட் புகைக்கும் சித்தரிப்புகள் வருவதில்லை.
Comments