“கில்லியை” (அல்லது “ஒக்கடுவை”) எங்கிருந்து சுட்டிருப்பார்கள்?

“கில்லி” எனக்குப் பிடித்த ஆக்‌ஷன் படங்களில் ஒன்று. அதுவும் விஜய்யின் வீட்டில் அவரது அறைக்குள் பதுங்கி இருக்கும் திரிஷா வரும் இடங்கள். ஒருமுறை அவரது அம்மா வந்து விட திரிஷா பொம்மைகள் நடுவே மறைந்து கொள்ளும் காட்சி வெகு அழகானது. கண்னிமைக்காமல் அவர், அந்த வெகுளி அம்மா சொல்வதைப் போல, ஒரு கண்கொள்ளா அழகு கொண்ட உயிருள்ள பொம்மையைப் போல இருப்பார். ஆனால் நம் இயக்குநர்களைத் தான் அப்படி சுலபத்தில் மனம் விட்டு பாராட்டி விடக் கூடாதே! நீங்கள் பாராட்டி விட்டு நிமிர்ந்தால் அதை எங்கிருந்தோ உருவின கதை தெரிய வரும். நேற்று இப்படித் தான் ஸ்பீல்பெர்கின் E.T. பார்த்துக் கொண்டிருந்த போது இதே போன்றதொரு காட்சி சட்டென இடறியது. 

E.T.யில் எலியட் எனும் சிறுவன் ஒரு குழந்தையைப் போன்ற, கள்ளங்கபடமற்ற, விளையாட்டுத்தனமான வேற்றுகிரகவாசியை கண்டடைகிறான். அந்த வேற்றுகிரகவாசி ஒரு ஆய்வுக்காக கூட்டமாக உலகத்துக்கு வந்த போது எதேச்சையாக இங்கேயே கைவிடப்படுகிறது. எலியட் அதை பாதுகாக்கிறான். அதற்கு மொழியையும் மனித வழக்கங்களையும் சொல்லித் தருகிறான். தனது சகோதரி மற்றும் சகோதரிக்கு அதை அறிமுகப்படுத்துகிறான். மூவரும் சேர்ந்து அதை திரும்ப தன் கிரகத்துக்கு அனுப்புவதற்கான வேலைகளில் ஈடுபடுகிறார்கள்; விசாரணை அதிகாரிகளிடம் இருந்து காப்பாற்றி கடைசியில் அதை ஒரு பறக்கும் தட்டில் ஏற்றி அனுப்பியே விடுகிறார்கள். 

இதற்கு நடுவே ஒரு காட்சியில் எலியட் குளிர்பதனப்பெட்டியில் இருந்து பொருட்களை எடுக்கையில் வேற்றுகிரகவாசி ஏதோ பொருட்களை கவிழ்த்துப் போட்டு சத்தம் எழுப்புகிறது. அவன் அதற்கான உணவுடன் வந்து பார்க்க அது பொம்மைகளுக்குப் பின்னே பதுங்கி இருக்கிறது. அது மெல்ல தன்னை வெளிப்படுத்த அவன் அதனுடன் உரையாடிகிறான். இந்த சில வினாடிகள் வரும் காட்சித் துண்டை சற்றே அழகு கூட்டி ரொமாண்டிக்காக்கி, பூரிப்பை உணர்த்தும் பின்னணி இசையுடன், “கில்லி” படத்தில் அந்த பிரசித்தமான பொம்மைக் காட்சியை எடுத்திருக்கிறார்கள். அந்த சிறுவனின் இடத்தில் விஜய்; வேற்றுகிரகவாசியின் இடத்தில் திரிஷா. 

(கில்லி தெலுங்கு படம் ஒக்கடுவின் ரீமேக் என்பதால் மேலே சொல்லியுள்ள பணியை "ஒரிஜினலாக" தெலுங்கு இயக்குநர் குணசேகரே பண்ணி இருக்க வேண்டும்)

இந்த ஒற்றுமை புலப்பட்ட நிலையில் ஒட்டுமொத்த படமுமே ஒருவிதத்தில் E.T.யின் ஆக்‌ஷன் ரொமாண்டிக் மறு உருவாக்கம் தானே என கேள்வி எனக்குள் எழுந்தது. ஆம். 

விஜய் எதேச்சையாக திரிஷாவை காப்பாற்றுகிறார். அதற்காக அவர் எதிர்கொள்ளும் பிரதான சவாலே தன் பெற்றோரிடம் இருந்து மறைப்பது; E.T.யிலும் இதுவே சவால். அடுத்து திரிஷாவை வெளிநாட்டுக்கு தப்பித்துப் போக வைக்க வேண்டும். E.T.யில் இது வேற்று கிரகம். இதற்காக விஜய் மொத்த தமிழக அரசு எந்திரத்துடனே மோத நேர்கிறது.  E.T.யில் குழந்தைகள் அரசாங்க அதிகாரிகளின் பெரும்படைக்கு எதிராக போராடி வேற்றுகிரகவாசியை காப்பாற்றி அனுப்புகிறார்கள். இதற்கு நடுவே கொஞ்சம் கபடி கபடி, அழகிரியை நினைவுபடுத்தும் பிரகாஷ்ராஜ், விஜய்யின் கலாட்டாக்களை சேர்த்தால் “கில்லி” தோன்றி விடுகிறது. முக்கியமான வித்தியாசம் கடைசியில் வெற்றிகிரகவாசி தன் கிரகத்துக்கு மீள, இங்கே திரிஷா விமானம் ஏறாமல் திரும்ப விஜய்யுடன் வாழ வருகிறார் என்பது. ஒரு குழந்தைகள் படத்தில் இருந்து ஒரு அடிதடி, பரபரப்பு, காதல் படத்துக்கான கதை வடிவத்தை எப்படி உருவுகிறார்கள் என யோசித்தால் ஆச்சரியமாக இருக்கிறது. 

பின்குறிப்பு: மணிரத்னம் இதற்கு முன்பே E.T. மற்றும் To Kill a Mocking Board ஆகிய படங்களின் காட்சிமொழியை பயன்படுத்தி “அஞ்சலி” படத்தை எடுத்திருக்கிறார்.