சமூகவலைதளங்களில் அவ்வளவு கொண்டாடப்பட்ட C U Soon ஒரு புத்திசாலித்தனமான, ஒரு முக்கியப் பிரச்சனையைப் பேசுகிற படம், ஆனால் அதைத் தாண்டி பார்த்தால் அது ஒரு சொதப்பலான திரைக்கதை. திரைக்கதையில் உள்ள முக்கியமான ஓட்டையை மறைக்க இறுதி 20 நிமிடங்களில் நமது நெஞ்சை உருக வைத்து விடுவார்கள், ஆனால் மீளப் பார்த்தால் இதே தாக்கம் இருக்காது. ஏன்?
முதலில், படம் ஆரம்பிக்கும் போது இது ஜிம்மியின் கதையாக இருக்கிறது - அண்மையில் ஒரு பெண்ணிடம் ஏமாந்தவன் அல்லது ஏதோ பெண் பிரச்சனையில் மாட்டிக்கொண்டவன் அவன் என போகிற போக்கில் சொல்லுகிறார்கள். அப்படியே டேட்டிங் ஆப்பில் சந்தித்த அனு எனும் அடுத்த பெண்ணிடம் அவன் யோசிக்காமல் காதலில் விழுகிறான். தன் அம்மா மற்றும் சகோதரியிடம் ஆன்லைனிலே அவளை அறிமுகப்படுத்துகிறான். அவனது அம்மா அவளைப் பற்றி விசாரிக்க அவர்களின் உறவினனான கெவினிடம் (பகத் பாஸில்) கேட்கிறார். இங்குதான் படம் ஆரம்பிக்கிறது. அனுவின் வாழ்க்கையில் ஏதோ புதிர் உள்ளது. அவள் தன்னைப் பற்றி நிறைய மறைக்கிறாள். அல்லது அவளை ஜிம்மி ஏமாற்றப் போகிறானா? இப்படி ஒரு குழப்பம் பார்வையாளர்களுக்கு ஏற்படுத்துகிறது.
அனு ஒருநாள் தன்னைத் தன் அப்பா மிகவும் துன்புறுத்துவதாகச் சொல்லி ஜிம்மியின் உதவியைக் கேட்க அவன் அவளை தன் வீட்டுக்கு அழைத்து வருகிறான். இருவரும் சேர்ந்து வாழ்கிறார்கள். திருமணம் செய்ய முடிவெடுக்கிறார்கள். இதனிடையே அனு ஒருநாள் தற்கொலைக் கடிதம் எழுதி வைத்து விட்டு காணாமல் போகிறாள். அவளது அப்பா அன்று அவளை வந்து சந்தித்திருக்கிறார். அவளை ஜிம்மி கொன்று விட்டான் என சந்தேகித்து போலிசார் அவனைத் தேடி வந்து வீட்டுக்க்காவலில் வைக்கிறார்கள். கெவின் இப்போது தலையிட்டு இணையத்தில் தேடி உண்மையை கண்டுபிடிக்கிறான். ஆனால் அப்போதே அனு ஜிம்மியின் அம்மாவிடம் அந்த உண்மையைச் சொல்லி விடுகிறாள் - அவள் துபாய்க்கு வேலை தேடி வந்து விபச்சாரத்தில் மாட்டிக்கொண்டு துன்பப்பட்டவள். அப்போதே ஜிம்மியின் தொடர்பு கிடைக்க தன்னை சிறைவைத்துள்ள மாபியாவிடம் இருந்து தப்பித்து இந்தியாவுக்குத் திரும்ப அவள் அவனை பயன்படுத்துகிறாள்.
ஜிம்மி அவளை மன்னிக்கிறானா, அவன் அவளுடன் இணைகிறானா என்பதே மிச்சக் கதை.
இப்போது உங்களுக்கே தெரிந்திருக்கும் இது ஜிம்மியின் கதையல்ல, அனுவின் கதை என. ஒரு சரியான திரைக்கதையில் இது அனுவின் நோக்கத்தில் இருந்தே, அதற்கான காரணத்தில் இருந்தே ஆரம்பித்து அவளிடத்தே முடிந்திருக்க வேண்டும். அவளது பார்வையில் இருந்து ஜிம்மியும் பிறரும் காட்டப்பட்டிருக்க வேண்டும். ஜிம்மியிடம் இருந்து ஆரம்பித்து கிளைமேக்ஸ் வரை கதையை எடுத்துச் சென்று அனுவை ஒரு புதிரானப் பெண்ணாகக் காட்டுவது சஸ்பென்ஸுக்காக, அதிர்ச்சி மதிப்புக்காக, பார்வையாளர்களை ஏமாற்றி படத்தை பார்க்க வைக்க மட்டுமே. அதனாலே இரண்டாவது, மூன்றாவது முறைப் பார்க்கும் போது இப்படம் உங்களுக்கு போரடிக்கும் என்கிறேன்.
ஜிம்மியின் அடிப்படையான தேவை அன்பை, காதலைக் கண்டடைவது. இணையத்தில் உள்ள பேக் ஐடிகள், அடையாளத்தை மறைத்த உறவாடல்களின் போலித்தனத்தைக் கடந்து உண்மையான பரிவை, பாசத்தை ஒரு பெண்ணிடத்து காண்பது. இதை ஓரளவுக்கு கிளைமேக்ஸில் காட்ட முயன்றிருக்கிறார்கள் என்றாலும் உணர்வுரீதியாக நிறைவளிக்காமல் போய் விடுகிறது.
இயக்குநர் மகேஷ் நாராயணனின் Takeoff இதைவிட நேர்த்தியான, தெளிவான திரைக்கதையைக் கொண்ட படம். C U Soon கதையை அவர் அவசரமாய் உருவாக்கி இருக்கிறார் எனத் தோன்றுகிறது. அதிகமாய் வெளியே செல்லாமல் ஐபோனில் படம்பிடித்து சிறப்பாய் தொகுத்திருக்கிறார் என்பதை பாராட்டலாம். இதே பாணியில் அமைந்த Searching படத்தையும் பார்க்கலாம் - அதனோடு ஒப்பிட்டால் நான் என்ன சொல்ல வருகிறேன் என்பது உடனடியாய் புரிந்து போகும்.
கருத்துகள்