நீரிழிவு ரிவர்ஸல் எனும் ஏமாற்று

ரிவர்ஸல் பேக் எனும் பிட்னஸ் நிறுவனத்தின் யுடியூப் விளம்பரம் ஒன்றைப் பார்த்தேன். அதில் பல “மாடல்கள்” தோன்றி எனக்கு நீரிழிவு நோய் போய் விட்டது (I am free of diabetes now) எனப் பேசுகிறார்கள். இதே போன்று வேறு பல விளம்பரங்களையும், காணொலிகளையும் கண்டிருக்கிறேன். இதையெல்லாம் நம்பாதீர்கள்: 

1) நீரிழிவை கட்டுப்படுத்தத் தான் முடியுமே ஒழிய, நிரந்தரமாக குணப்படுத்துவது சாத்தியமில்லை. 

2) கணையத்தை மாற்று அறுவை செய்து கொண்டால் ஒருவேளை தீர்வு கிடைக்கலாம். ஆனால் அது மிகவும் செலவு பிடித்தது, அதற்கான ரிஸ்கும் உண்டு.

3) குடலின் நீளத்தைக் குறைத்து, வயிற்றை சுருக்கித் தைக்கும் bariatric சிகிச்சை பண்ணிக் கொண்டோருக்கு எதிர்பாரா விதமாக நீரிழிவு குணமாவது உண்டு.

4) இந்த தீவிரமான அரிதான சாத்தியங்களை ஒழித்துப் பார்த்தால் நீரிழிவை ரிவர்ஸ் செய்கிறேன் பேர்வழிகள் சொல்வது சுத்தப் பொய். 

5) நீங்கள் டைப் 1 நீரிழிவாளர் என்றால், ஒருநாளை நூறு யூனிட்டுகளுக்கு மேல் இன்சுலின் எடுப்பவர் என்றால் அதை 10-20 என குறைக்கலாம். எப்படி? உண்ணாநோன்பின் வழி - One meal a day என்கிறார்களே அந்த வழியில் நாளொன்றுக்கு ஒரே ஒரு வேளை குறைவான கலோரிகள் சாப்பிட்டால் இன்சுலினையும் குறைவாக எடுத்துக் கொண்டு நீரிழிவின் மோசமான விளைவுகளை தவிர்க்கலாம். (பசி, சோர்வு, தொடர்ந்து சிறுநீர் கழிப்பது துவங்கி கண்பார்வை, கை, கால்களை இழப்பது வரை) இதுவொன்றும் புதிதல்ல, 1920 களிலேயே மருத்துவர்கள் இதை வெற்றிகரமாக முயன்று பார்த்திருக்கிறார்கள். நிறைய பேரால் பசியைத் தாங்க முடியாது என நினைத்து இதை பொதுவெளியில் மருத்துவர்கள் பரிந்துரைப்பதில்லை.

6) அடுத்து, மூன்று வேளை சேலட், கொழுப்பை மட்டும் சாப்பிட்டு இன்சுலின் அளவை 60-70% குறைக்கலாம் என நினைக்கிறேன் (பேலியோ டயட்).

7) எடை குறைப்புக்கும் இன்சுலின் சென்சிட்டிவிட்டிக்கும் தொடர்புண்டு (அதாவது எடை குறைந்தால் இன்சுலினையும் குறைக்கலாம்) என ஆய்வுகள் சொல்லுகின்றன. ஆனால் இந்த வித்தியாசம் மிகச் சொற்பமானதே. அடிப்படையில் உள்ளே போகும் உணவின் அளவும், வகைமையுமே ரத்த சர்க்கரையின் சூத்திரதாரி.

8. இதே தர்க்கப்படி, ஒருவரது உடலுழைப்பு, உடற்பயிற்சியின் அளவுக்கும், அவருடைய கட்டுடலுக்கும் அவருடைய ரத்த சர்க்கரைக்கும் தொடர்பில்லை. நான் மாணவனாக இருக்கும் போது தாம்பரத்தில் ஒரு ஜிம்முக்கு சென்றேன். அதை நடத்தி வந்த 40 வயது மாஸ்டர் புரூஸ்லீயைப் போல கட்டான தசைகளுடன் இருப்பார். அவர் 16 வயதில் இருந்தே நீரிழிவுடன் போராடி வந்தார்.

9) டைப் 2 நீரிழிவாளர்கள் ஒருவேளை இந்த டயட் முறைகளில் மாத்திரைகளை நிறுத்த முடியலாம். ஆனால் அதுவும் தற்காலிகமே. நமது உடல் பல மாயங்களை செய்யக் கூடியது. உடலில் வேறேதாவது பிரச்சனை ஏற்பட்டு அதனால் சர்க்கரை அளவு ஏறி இறங்கலாம். ஆனால் டைப் 2வை பொறுத்தமட்டில் மருந்தின்றி வாழ்வது சாத்தியமே. அதே நேரம் இதை “ரிவர்ஸல்” எனச் சொல்லி ஏமாற்றுவது நியாயமல்ல. ஒருவேளை ஒரே ஒரு தேநீர் சாப்பிட்டாலே இந்த “ரிவர்ஸல்” சோலி முடிந்து விடும். 

10) ரிவர்ஸலை நம்புவதைப் போன்றே மருந்தால் மட்டுமே நீரிழைக் கட்டுப்படுத்தலாம் என நினைப்பதும் மோசமான விளைவுகளைத் தரும். உடல் எடை கூடிக் கொண்டே போகும். ஒருவித லேசான மயக்க நிலை தொடரும். மாத்திரைகளில் இருந்து இன்சுலினுக்கு “முன்னேறி” 20-30 யூனிட்டுகளில் இருந்து 150-180 யூனிட்டுகள் வரை எடுக்கும் நிலை வரலாம். இது பெட்ரோல் லீக் ஆகும் வண்டியில் மேலும் மேலும் பெட்ரோல் நிறைப்பதற்கு சமமான வியர்த்தமான வேலை என்று சொல்வார்கள். அதற்குப் பதில் குறைவான பெட்ரோலில் வண்டியை ஓட்டப் பழகுவதும், மாற்று எரிசக்தியை நாடுவதும் அதிக பலனளிக்கும், நீடித்த பலனளிக்கும் வழிமுறைகள்.