ஹர்ஷல் பட்டேல் இன்று தன் முதல் போட்டியில் எவ்வளவு பிரமாதமாக வீசினார். எந்த பதற்றத்தையும் அவர் காட்டவில்லை. பெங்களூருக்காக ஐ.பி.எல்லில் இந்த பருவத்தில் வீசியதைப் போன்றே வீசினார் - துல்லியமான திசை மற்றும் நீளம், ஏகப்பட்ட மெதுபந்துகள், ஒவ்வொன்றும் 110, 115, 125 கி.மீ வேகங்களில். ஒன்றிரண்டு பந்துகளை வெரைட்டிக்காக 130இல் வீசினார். நீளத்திலும் திசையிலும் கூட ஒரு மாறுபட்ட தன்மையை ஒவ்வொரு பந்துக்கும் கொண்டு வருகிறார். நான்காவது குச்சிக்கு வெளியே இரண்டு மெதுபந்துகள் முழுநீளத்தில் என்றால், அடுத்து ஒரு பந்தை அதே நீளத்தில் சற்று வேகமாக உள்ளே கொண்டு வருகிறார். அடுத்து மீண்டும் மெதுபந்துகள் இரண்டு சற்று பின்னால் நல்ல நீளத்தில் (good length). இறுதிப் பந்து மீண்டும் சற்று வெளியே முழுநீளத்தில் மெதுவாக. இப்படி ஒரு பாணியை அனேகமாக எல்லா போட்டிகளிலும் பின்பற்றுகிறார். அவருக்கு நினைக்கிற இடத்தில் வீச முடிகிற கட்டுப்பாடு உள்ளது - இலங்கையின் முன்னாள் மிதவேக ஸ்விங் வீச்சாளர் சமிந்தா வாஸைப் போல. சுலபமாக லட்டு பந்துகளை மட்டையாளருக்கு தூக்கிக் கொடுக்க மாட்டார்.
சில மிதவேக வீச்சாளர்கள் - பிராவோ கூட - பவர் பிளேவில் வேகமாக வீசி அடிவாங்கி விட்டு ஆட்டத்தின் இறுதி ஓவர்களில் மட்டும் மெதுபந்துகளை வீசுவார்கள். ஆனால் ஹர்ஷல் பட்டேலோ முதல் ஓவரில் இருந்தே மெதுபந்துகளை வடை மாஸ்டர் உருட்டி உருட்டி பதமாக எண்ணெயில் விடுவது போல போடத் தொடங்கி விடுவார். இது தான் என்னுடைய வலிமை, எப்போது கேட்டாலும் இவ்வாறே வீசுவேன் எனும் தெளிவு அவருக்கு உள்ளது. ஒன்றிரண்டு பவுண்டரிகள் கொடுத்தாலும் உணர்ச்சிவசப்படாமல் நிதானமாக நிலைமையை கையாள்கிறார்.
இவ்வளவு சிறப்பான ஒரு டி20 நிபுணரை எப்படி உலகக்கோப்பை அணியில் எடுக்காமல் விட்டார்கள்? வடிவேலுவின் நகைச்சுவை காட்சி ஒன்றில் ஜூனியர் வக்கீல்கள் ஜாமீனைத் தேடி மீன் சந்தைக்கு போனதைப் போல நம் தேர்வாளர்கள் டி20க்கு பந்து வீச்சாளர்களை கொண்டு வரோம் என்று டெஸ்ட் வீச்சாளர்களாக கொண்டு வந்து நம்மை தலையை கம்பியில் முட்ட வைத்தார்கள். யோவ் சேத்தன் ஷர்மா இனியாவது பார்த்து கத்துக்கோயா. வாளை மீன் இருக்குங்கிறாங்க, வெலமீன் இருக்குங்கிறாங்க என்று திரும்பவும் ஆரம்பிச்சிராதீங்க!
கருத்துகள்