கீட்டோ உணவுமுறை - சவால்கள்

 

கடந்த மூன்று நாட்களாக கீட்டோ உணவுமுறையைப் பின்பற்றுகிறேன். 2 வாரங்களில் இருந்து 4 வாரங்கள் வரை பின்பற்றி விட்டு பழையபடி portion controlக்கு செல்ல உத்தேசம். இதற்கு முன்பு நான் சுமார் ஒரு ஆண்டுக்கு ஒரு குத்துமதிப்பான பேலியோவைப் பின்பற்றியதுண்டு - அதாவது அதை பேலியோ என்று நிபுணர்கள் ஒப்புக் கொள்ள மாட்டார்கள். அந்த காலத்தில் நான் பழம், சிக்கன், முட்டை, பால், கொஞ்சம் பாதாம் சாப்பிடுவேன். தானியங்கள், பருப்புகளை தவிர்ப்பேன். அந்த அரைகுறை பேலியோவிலேயே எனக்கு மூன்று கிலோவுக்கு மேல் எடை குறைந்தது. ஆனால் இந்த முறை துல்லியமாக, எந்த சமரசமும் இன்றி கீட்டோவைப் பின்பற்ற முடிவெடுத்தேன். 

முதல் சவால் மாவுச்சத்து 20 கிராமுக்குக் குறைவாக ஒரு முழுநாள் உணவில் இருக்க வேண்டும் என்பது. இது மிக மிக சிரமம். மாவுச்சத்துள்ள தானியங்கள், பருப்புகள் எவையும் கூடாது. பால், பழம் கூடாது. சரி போகட்டும், நீங்கள் காய்கறி, பாதாம் போன்ற உணவுகளை சாப்பிடால் என நினைத்தாலும் மாவுச்சத்து கட்டுப்பாட்டைக் கடந்து கூரை மீதேறி ஓடி விடும். சிக்கன், மாட்டுக்கறி போன்றவற்றையும் வெங்காயம், தக்காளி சேர்த்து மசாலாவாக பண்ணி சாப்பிட்டாலும் மாவுச்சத்து கூடும். ஐந்து வேளை உணவில் ஒவ்வொரு வேளையும் 3-4 கிராமுக்குள் மாவுச்சத்தை கட்டுப்படுத்தினாலே நாள் முடிவில் 20 கிராமுக்குள் கொண்டு வர முடியும். 

இதற்கு சிறந்த வழிகள் அடுத்த நாள் உணவை முன்கூட்டியே திட்டமிடுவது, கொழுப்புச் சத்தை அதிகமாக எடுத்துக் கொள்ளுவது (அது மட்டும் தான் மாவுச்சத்தை தவிர்க்க உதவுவது.). ஒரு நாளைக்கு நான் 1500 கலோரிகள் உண்கிறேன் என்றால் அதில் 125 கிராமுக்கு மேல் கொழுப்பும், 60-70 கிராமுக்குள் புரோட்டீனும் இருக்கலாம். புரோட்டீனை இன்னும் குறைத்து கொழுப்பை மேலும் அதிகப்படுத்தவும் செய்யலாம். நான் காலை உணவில் இருந்து மாலை நொறுக்குத் தீனி வரை அதிகமாக கொழுப்பைக் உட்கொண்டு அதுவரையிலான மாவுச்சத்து 10க்குள் இருக்கும்படி பார்த்துக் கொள்வேன். அப்போது தான் இரவுணவில் கொஞ்சம் அதிகமாக மாவுச்சத்து இருந்தாலும் கட்டுக்குள் இருக்கும். தரப்பட்ட 20 கிராம் மாவுச்சத்தைத் தாண்டி ஒரு கிராம் கூடுதலாக உட்கொண்டால் கூட கீட்டோஸில் எனும் உடம்பின் கொழுப்பு எரிக்கப்படும் நிலை வராது என்கிறார்கள்.

வழக்கமாக கீட்டோவில் கேஸ் பிரச்சனை வரும். சிலர் வயிற்று வலி காரணமாகவே விட்டு விடுவார்கள். மற்றொரு பிரச்சனை மலச்சிக்கல். அதிர்ஷ்டவசமாக எனக்கு இரண்டும் வரவில்லை. மலப்பிரச்சனையை கருத்திற் கொண்டு நான் Isabgol எனும் நார்ச்சத்து பொடியை எடுத்துக் கொண்டேன். அதனால் காலைக்கடனை சரளமாக கழிக்க முடிந்தது.

தாகமும் சிறுநீர் கழித்தலும் மற்றொரு தொந்தரவு. மூன்று நான்கு லிட்டர்கள் தண்ணீர் சாதாரண்மாகவே உள்ளே போகிறது. அடிக்கடி பாத்ரூம் போய் போய் அலுக்கிறது. ஆனால் உடம்பில் உள்ள கிளைகோஜென் எனும் மாவுச் சத்து இருப்புத்தொகை செலவிடப்படுகிறது, மாவுச்சத்து நீருடன் இணைந்து இருக்கிற வஸ்து என்பதால் மாவுச்சத்து எரிக்கப்பட நீரும் சிறுநீராக வெளியேறும் என இணையத்தில் படித்தேன். உடம்பில் சேமிக்கப்பட்ட மாவுச்சத்து காலியானதும் உடம்பு கொழுப்பை எரிக்கத் தொடங்கும் - அதாவது கீட்டோஸிஸ் நடக்கும். அதனால் இந்த நீரதிகாரம் ஒரு நல்ல அறிகுறியே.

 

 கீட்டோஸிஸ் தான் எடை குறைப்புக்கு பிரதான காரணி. வரும் ஞாயிறுடன் ஐந்தாவது நாள் நிறைவாகும். அன்று என் மூத்திரத்தில் கீட்டோன் டெஸ்ட் ஸ்ரிப்பை பயன்படுத்தி சோதிக்கையில் அதில் கீட்டோன்கள் இருப்பதாகத் தெரிந்தால் கீட்டோ உணவு முறை வெற்றி எனப் பொருள். 

நம்பிக்கை இருக்கிறது. பார்க்கலாம்.