2025 மிகவும் சோர்வான வருடம் எனக்கு. எழுத, வாசிக்க, சிந்திக்க, செயல்பட அவகாசம் குறைவு. எழுத்துத் திட்டங்களும் தொலைவாகிப் போயின. அப்போதுதான் 2017-2020 காலகட்டம் எவ்வளவு சிறப்பானது என்று புரிந்தது. பிடித்ததைப் போல வேலை பார்க்க, எழுத, படிக்க, சிந்திக்க இயன்றது. உள்ளார்ந்த மகிழ்ச்சி இருந்தது. அதன்பிறகு நீதிமன்றம், குள்ளநரி வக்கீல்கள், நல்லியல்பான வக்கீல்கள், அலுப்பான கடினமான பயணங்கள், ஆவணங்கள், அச்சம் என என் உலகம் மாறியது. அங்கிருந்து மீண்டு வந்தபின்னர் வேலைக் களம் ஒரு வதைக்களம் ஆகியது.
என்ன நடந்தால் என்ன எனும் மனநிலையுடன் என்னால் போகிற போக்கில் ஜாலியாக இருக்க முடிவதில்லை - எப்போதுமே கடிகாரம் டிக்டிக் என ஒலித்தபடி இருக்கிறது. இன்னும் சில வருடங்கள்தாம், அதற்குள் எழுத்து இலக்குகளை எட்ட வேண்டும், எழுத்தில் இருந்து கிடைக்கும் மகிழ்ச்சியை அனுபவிக்க வேண்டும் என்றே மனம் தவிக்கிறது. இலக்கு, குறிக்கோள், எதிர்பார்ப்பு ஆகியவை இல்லாதபோது காலமே இல்லையெனும் ஒரு பிரமை ஏற்படுகிறது. போகிறபோக்கில் வாழ்வது அத்தகையோருக்கே சாத்தியம். எனக்கு அத்தகைய உலகம் மேம்போக்காக, அர்த்தமற்றதாக, அலுப்பாகத் தோன்றுகிறது.
அவ்விடத்தில் 2025 என்னை இந்த போகிற போக்கில் ஓடும் உலகுக்கு இழுத்துச் சென்றுவிட்டது. அந்த நெருக்கடிகளையும் மீறி ஒரு நாவலை எழுதினேன். இன்னொரு நாவலை 70% முடித்தேன். ஆனாலும் கடந்த இரு ஆண்டுகளில் நான் எழுதியவையும் படித்தவையும் மிகவும் குறைவு எனத் தோன்றுகிறது.
என் இருபதுகளில் இருந்தே ஒரு பழக்கம் - வரக்கூடிய 3-5 வருடங்களை வரையறுத்து முடிவில் நான் 'நிச்சயமாக' இறந்துவிடுவேன் எனத் தீர்மானம் எடுப்பேன். சாவு நெருங்கும் முன் முடிப்பதற்கான வேலைகளை நோக்கி ஓடுவேன். இந்த காலமற்ற, இலக்குகள அற்ற, எந்திரத்தனமாக, சோறு, பாதுகாப்பு, வேலை, ஓய்வு எனும் அன்றாட உலகை முறியடிக்க எனக்கு மரணத்தின் அருகாமைதான் உதவுகிறது. காலம் நிபந்தனைக்குட்டதாக மாறும்போது அதற்கு தனி அழகு கூடுகிறது. இந்த வாழ்க்கையே எல்லையற்ற காலத்திற்கும் எல்லைக்குட்பட்ட காலத்திற்குமான போட்டிதான் எனத் தோன்றுகிறது. மீண்டும் மீண்டும் நான் எனக்கு மரணத்தை நினைவுபடுத்திக் கொள்ள விரும்புகிறேன். நிபந்தனைக்குட்பட்ட காலத்தில் நான் எனக்காக வாழ இயலும். எல்லாமே ஒரு வேடம்தான் என்றாலும் இந்த வேடம் எனக்கு சௌகர்யமாக அழகாகத் தோன்றுகிறது.
2026ஐ இவ்வாறு மதிப்புக்குரியதாக மாற்றுகிறது. ஒரு கணத்தைக் கூட வீணடிக்காமல் சிறப்பானதாக அதை அமைக்க வேண்டும். டிக் டிக் டிக்...
Comments