கெ.எல் ராகுலின் ருத்திர தாண்டவம்

ரஞ்சிக் கோப்பை காலிறுதிப் போட்டி

Mumbai - 120 & 377

Karnataka - 173 & 325/6 (T:325)

மும்பை மிக மிக அரிதாகத்தான் இறுதிப் போட்டிக்கு வராமல் போகும். 42 முறைகள் ரஞ்சிக் கோப்பையை அடித்துள்ள அணி. உலக கிரிக்கெட்டிக்ல் ஆஸ்திரேலியா எப்படியோ அப்படி ரஞ்சிக் கோப்பை வரலாற்றில் மும்பை இருக்கிறது. ரொம்ப ரொம்ப சுமாராக ஆடிய தொடர்களில் கூட அது எப்படியோ இறுதிப் போட்டியை அடைந்து அபாரமாக ஆடி வென்றுள்ளது. ஆனால் இம்முறை கர்நாடகாவிற்கு எதிராக மும்பை ரயில் தடம் புரண்டுவிட்டது. டி20 உலகக்கோப்பைப் போட்டிகளை விட பலமடங்கு பரபரப்பான சுவாரஸ்யமான போட்டியாக இது அமைந்தது. முதல் நாள் மும்பை 120க்கு ஆட்டமிழந்தபோது அவர்களது சோலி முடிந்தது என நினைத்தேன். ஆனால் மீண்டு வந்தார்கள். இரண்டாவது இன்னிங்ஸில் அவர்கள் 377 அடித்தபோது அரை இறுதிக்குப் போகப் போகிறார்கள் என நினைத்தேன். ஆனால் ஆடுதளம் தட்டையாகிவிட மும்பையும் சோர்ந்து போனது. அவர்கள் விழித்துக்கொண்டு போராடியபோது ஆட்டம் கிட்டத்தட்ட முடிந்திருந்தது. கெ.எல் ராகுல் பிரமாதமாக ஆடி கர்நாடகாவை வெல்ல வைத்தார். ரவிச்சந்திரன் ஸ்மரனும் நன்றாக ஆடினார். அவர் இப்போதைக்கு 60க்கு மேல் சராசரி வைத்திருக்கிறார். ஸ்டைலான இடதுகை மட்டையாளர். திறமையாளர். ஒரே பலவீனம் ஆப் ஸ்டம்பில் விழுந்து வெளியே போகும் முழுநீளப் பந்தை கால் நகர்த்தாமல் ஆடுகிறார். அடுத்த சில பருவங்களில் பந்து வீச்சாளர்கள் இந்த பலவீனத்தை இலக்காக்குவார்கள். கெ.எல் ராகுல் இவ்வளவு கூலாக திடமாக இந்திய அணி நெருக்கடியில் இருக்கும்போது ஆடிப் பார்த்ததில்லை. சர்வதேசப் போட்டிகளிலும் அவரால் இதே போல நெருக்கடியைச் சமாளிக்க முடியுமெனில் சுலபமாக இந்தியாவின் நம்பர் 1 மட்டையாளர் ஆகிவிடுவார். ஆனால் அங்கு மட்டும் அவருக்கு கால் நடுங்கும். மரணக் கட்டை போட்டு அவுட் ஆகி விடுவார்.

செமையான போட்டி. ஹாட்ஸ்டாரில் ஹைலைட்ஸ் இருக்கும். பாருங்கள்.