தொகுதி மறுவரையறைச் சட்டத்திற்கு ஏன் திமுக ஆதரவளிக்கக் கூடாது?

இரு பார்வைகள்

1) 50% இடங்கள் எல்லா மாநிலங்களுக்கும் அதிகாரிக்கப்படுமெனில் மாநில மறுவரையறைச் சட்டம் பெரிதாகச் சிக்கலற்றதாகவே தெரிகிறது. கார்த்தி சிதம்பரம் இதற்கு எதிராக வைக்கும் ஒரே வாதம் பாராளுமன்றத்தில் எம்.பிக்களின் எண்ணிக்கை அளவுக்கு அதிகமாகிவிடும், செறிவான விவாதங்கள் சாத்தியப்படாமல் போகும் என்பதே. இது ஒரு வலுவான வாதம் அல்ல.

2) அதேநேரம் இடங்களின் எண்ணிக்கை வித்தியாசம் தென்மாநிலங்களை மறுவறையரைக்குப் பின் மிக மோசமாக பாதிக்கக்கூடிய நிலையும் வரக் கூடும். இப்போது நமக்கும் (தமிழ்நாடு + பாண்டிச்சேரி) உ.பிக்குமான எண்ணிக்கை வித்தியாசம் 40 என்றால் இந்த 50% அதிகரிப்பிற்குப் பிறகு அது 60 ஆகும். பாஜக ஆதரவு உள்ள இந்தி பெல்ட் மாநிலங்களைப் பார்ப்போம்.

இப்போதைக்கு உத்தர பிரதேசம், ராஜஸ்தான், மத்திய பிரதேசம் உள்ளிட்ட 9 மாநிலங்களை எடுத்துக் கொண்டால் அவற்றிற்கு 171 இடங்கள் உள்ளன. மறுவரையறைக்குப் பிறகு அது 256ஆக மாறும். தென்மாநிலங்களுக்கு இப்போதுள்ள இடங்கள் 130.

அதிகரிப்பிற்குப் பிறகு அது 195 இடங்களாகிறது. இப்போதைய வித்தியாசம் 41 இடங்கள் எனில், , மறுவரையறைக்குப் பின் அது 62 ஆகிறது. இது பீகாரை உள்ளடக்காமல்தான். பீகாரையும் சேர்த்தால் வித்தியாசம் 122 இடங்களாகி விடும். இங்குதான் சிக்கலே ஆரம்பிக்கிறது. ஏனென்றால் அப்போது பாஜக பீகாரிலும் ஆதிக்கம் செலுத்தினால் மொத்தமுள்ள 317 இடங்களில் கணிசமானவற்றைப் பெற்று தென்மாநிலங்களும் தாம் வலுவாக இல்லாத பிற மாநிலங்களையும் வைத்துக் கூட தொடர்ந்து ஒன்றியத்தைக் கைப்பற்றும் நிலை ஏற்படக் கூடும். குறிப்பாக, பாஜக தேர்தல் எந்திரத்தின் உதவியுடன் கடும் போட்டி உள்ள தொகுதிகளில் சொற்ப வித்தியாசத்தில் பல இடங்களை வெல்லுகிறது, பிற கட்சிகளின் எம்.பிக்களை மிரட்டியும் ஆசை காட்டியும் தொடர்ந்து தன் வசம் இழுத்துக் கொள்கிறது என்பதையும் பார்க்கும்போது நிஜமான ஆதரவு இன்றியே கூட அவர்களால் தேர்தலை ஒரு வேடிக்கை நிகழ்வாக மாற்றி அடுத்த 30 ஆண்டுகளும் எதிர்க்கட்சியே இல்லாத தேர்தல் எதேச்சதிகார ஆட்சியை நடத்தக் கூடும். நாம் சில லத்தீன் அமெரிக்க நாடுகளைப் போல, பாகிஸ்தானைப் போல கைப்பற்றப்பட்ட தேசமாகி விடக் கூடும்.

2024 நாடாளுமன்றத் தேர்தலில் 240 இடங்களை மட்டும் வென்ற பாஜகவால் 107 இடங்களை 8 இந்தி பெல்ட் மாநிலங்களில் இருந்து பெற முடிந்தது. மறுவரையறைக்குப் பின் அடுத்த தேர்தலில் இதே ஆதரவு தொடருமானால் அந்த எண் 127 ஆகி விடும். கடந்த தேர்தலில் பாஜக மீதமுள்ள 133 இடங்களைப் பெற்ற குஜராத், மகாராஷ்டிரா, மே.வங்கம், ஒடிஷா, அஸாம் ஆகிய மாநிலங்களை எடுத்துக் கொண்டால் அங்கும் ஆதரவு தொடருமானால் அவற்றின் எண்ணிக்கையும் 151இல் இருந்து 227 ஆகி விடும். இந்த 76 இடங்களின் வித்தியாசமும் பாஜகவுக்கு கைகொடுக்கக் கூடும். பாஜக ஆதரவு ஹிந்தி பெல்ட், ஹிந்தி பெல்ட் அல்லாத மாநிலங்களுக்கு கிடைக்கும் உபரி இடங்களைப் பார்த்தால் 198 ஆகிறது. சாட்ஜிபிடி 182தான் சரியான எண் என்கிறது. 182-198 என வைத்துக் கொண்டாலும் இது கணிசமான வித்தியாசமே.

இந்த 50% அதிகரிப்பை தமிழ்நாடு vs உ.பி என சுருக்கினால் அது ஒரு சித்திரத்தை அளிக்கும். ஒட்டுமொத்தமாக பாஜக ஆதரவு மாநிலங்கள் vs பாஜக ஆதரவு குறைந்த மாநிலங்கள் எனப் பார்த்தால் அது 180-200 வரையிலான வித்தியாசத்தைக் கொடுக்கிறது. அதாவது, தற்போதைய தேர்தல் போக்குகள் தொடர்ந்தால், பாஜகவுக்கு நாடாளுமன்றத்தில் குறிப்பிடத்தக்க முன்னிலை உருவாகக்கூடும். பாஜகவின் எண்கள் 240இல் இருந்து 440 (815) ஆகக் கூடும். 543இல் 240 என்பதை விட இது மேலான எண் தானே?

ஒரு ஓட்டப்பந்தயத்தை எடுத்துக் கொண்டால் சில அடிகள், அங்குலங்கள் வித்தியாசமே வெற்றியாளருக்கும் தோல்வியாளருக்கும் இருக்கும். பாஜக இதை வைத்துத்தான் ஆட நினைக்கிறது.

ஆகையால் திமுக இந்த தொகுதி மறுவரையறைக்கு ஆதரவளிப்பது ஒட்டகத்தைத் தன் முகத்தை மட்டும் கூடாரத்திற்குள் அனுமதிப்பதைப் போலாகிவிடும். ரெண்டு அடிகள் பின்னால் போவதே நல்லது.

பி.கு: பாஜகவின் ஆதரவு மேற்சொன்ன இந்தி பெல்ட் மற்றும் இந்தி பெல்ட் அல்லாத மாநிலங்களிலும் அடுத்த நாடாளுமன்ற தேர்தலில் தலைகீழாக மாறவும் கூடும்தான். அதேநேரத்தில், பொதுவாக வரலாற்றைப் பார்க்கையில் மிகப்பெரிய மாற்றங்களை இம்மாநிலங்கள் தேர்தல் முடிவுகளில் தருவதில்லை. படிப்படியாக வளர்ச்சி பெறும் கட்சிகள் ஒரேயடியாக ஓய்ந்து போவதும் இல்லை.