'யாருக்காக ஒலிக்கிறது இம்மணி முழக்கம்'

https://www.facebook.com/reel/1372212077667223

இதைத்தான் நான் ஏற்கனவே ஒரு பதிவில் சொன்னேன் - சாய் தீபக்கைப் போன்ற சங்கி அறிவுஜீவிகளே மோடி அரசை விமர்சிக்கிறார்கள் என்றால் அவர் மீது அழுத்தம் போடும்படியான முடிவை பாஜக உட்கட்சி போட்டியாளர்கள் எடுக்கிறார்கள் எனப் பொருள். மோடியை அவரது இந்துத்துவத்துக்காக ஆதரிக்கும் மக்கள் திரள் கல்வி அமைச்சகத்தின் நிர்வாகக் கோளாறையும் கரப்பான்களை அந்நிய சக்திகள் தூண்டி விடுவதான நியாயங்களையும் ஏற்க மாட்டார்கள் என்கிறார். அதாவது மோடியை நேரடியாகத் தாக்காமல் லேசாக ஒரு குத்து விடுகிறார். இந்த கரப்பான் பூச்சி போராட்டமே இதனால்தான் இவர்களால் மறைமுகமாக அனுமதிக்கப்படுகிறதோ எனும் ஐயம் வருகிறது. தன்னிச்சையாக இது நடந்து இவர்கள் அதைப் பயன்படுத்துவதானால் தில்லியில் ஜந்தர் மந்தரில் இத்தனை நாட்கள் போராடியிருக்க மாட்டார்கள். எதிர்பாராதவிதமாக சில விபத்துகள் நடந்து உயிரிழப்பு ஏற்பட்டு மக்கள் போராடி மோடிக்கு அவப்பெயர் ஏற்பட்டிருக்கும். இதுவே தெளிவாகத் திட்டமிட்டு கடந்த சில மாதங்களில் உயிர்ப்பெற்றிருக்கிறது. கரப்பான்களைப் போன்ற இளைஞர்கள் எனும் நீதிபதியின் சொல்லாடலைப் பயன்படுத்தி பகடி அமைப்பாக உருவானவர்கள் அப்போது கவனம் பெற்ற தேர்வுத்தாள் முறைகேட்டை எடுத்துக் கொள்கிறார்கள். அதாவது அந்த முறைகேட்டு விவகாரமும் குறிப்பான ஒரு கருத்தியல் பிரச்சினையோ நீண்ட காலமாக கரப்பான்களைப் பாதித்த பிரச்சினை அல்ல. அதை அவர்கள் எடுத்துக் கொள்கிறார்கள். அதற்குப் பதிலாக இளம்பெண்கள் பலாத்காரம் போன்ற ஒன்று கிடைத்திருந்தால் அதை எடுத்திருப்பார்கள். நேரடியாக மோடியைக் குற்றம் சாட்டக்கூடாது, அதேநேரம் அவர் மீது அழுத்தம் போட வேண்டும், நேரடியாக பாஜகவின் இந்துத்துவாவை, அடிப்படைக் கொள்கைகளைத் தாக்கலாகாது, ஆனால் நிர்வாகம் சார்ந்த ஒரு கோளாறை எடுத்துக் கொள்ளலாம் என்பதே அவர்களுக்கான கட்டளை என நினைக்கிறேன்.

இது ஒரு தன்னெழுசசிப் போராட்டமாக சில இடங்களில் நடந்தாலும் அபிஜீத் தீப்கேயின் கீழ் நடப்பன தெளிவாகத் திட்டமிட்ட வியூகத்தின் அடிப்படையிலான போராட்டமே. அவர் ஒரு அரசியல் ஹிட்மேன். இப்போராட்டம் முடிந்ததும் போய்விடுவார். அடுத்து அவரோ இன்னொருவரோ கொண்டு வரப்படுவார். அது வேறொரு பெயரில் புதிய பேனரின் கீழ் நடக்கும் என ஊகிக்கிறேன்.

பாஜக ஆதர்வாளர்கள் அல்லாதோருக்கு இதிலுள்ள ஒரே அக்கறை மோடி பலவீனப்பட்டால் அது பாஜகவை பலவீனப்படுத்துமா என்பது மட்டுமே. தொடர்ந்து இம்மாதிரி நிகழ்வுகளை நேரடியாகப் பொருள்படுத்தாமல் மறைமுக கதையாடல்களைக் கவனித்தால் பாஜகவுக்குள் என்ன நடக்கிறது என கணிக்க முடியும்.

இப்போராட்டங்களை ஓரளவுக்குக் கட்டுக்குள் கொண்டு வந்தபின்னர் மோடி தான் எப்படி மாணவர்களின நலனுக்காக கண்ணீர் விடுகிறேன், அவர்கள் நம் நாட்டின் கண்கள் என சில பல பேச்சுக்களைப் பேசுவார். சில வாரங்களில் பிரதானைப் பதவி விலக வைப்பார். அப்போது அது போராளிகளின் வெற்றியாக அல்லாமல் மோடியின் தூய ஆட்சியின், கறாரான அணுகுமுறையின் வெற்றியாக ஊடகங்களால் காட்டப்படும்.

உள்ளுக்குள் மோடியின் எதிரிகள் அடுத்தடுத்த கரப்பான்களை, சிலந்திகளை, பாம்புகளை தம் ஆய்வகத்தில் வளர்ந்த்துக்கொண்டு சரியான சந்தர்ப்பம் பார்த்துக் கொண்டிருப்பார்கள்.