என்கவுண்டர் என்பதே போலி இல்லையா?

திருப்பதி வனப்பகுதியில் நடந்த 20 பேர் என்கவுண்டர் பற்றின சேதிகளை கேட்கும் போது எனக்கு மேற்கண்ட கேள்வி தான் எழுகிறது. இந்த என்கவுண்டர் சம்மந்தமாக மீடியா முன்வைக்கும் கேள்விகளான 20 பேரும் வெறும் உள்ளாடைகளுடன், ஒரு மாத பழைய சந்தனக்கட்டைகளுடன் படுக்க வைக்கப்பட்டுள்ளது, ஒரே போல் நெஞ்சு மற்றும் வயிற்றுப் பகுதிகளில் சுடப்பட்டிருப்பது, அங்கு 5 கிலோமீட்டர் சுற்றளவில் சந்தன மரங்களே இல்லாதது ஆகியவை இந்த என்கவுண்டர் காவல்துறையால் சித்தரிக்கப்பட்டுள்ள விதத்தின் குறையை தான் மீண்டும் மீண்டும் விமர்சிக்கின்றன. ஒருவேளை இந்த என்கவுண்டர் இன்னும் நம்பத்தகுந்த முறையில் “சித்தரிக்கப்பட்டிருந்தால்” சரியா? அப்போது நம் மனசாட்சி உறுத்தப்பட்டிருக்காதா?

 ஒருவேளை அவர்கள் ஆடைகளுடன் வெவ்வேறு போஸ்களில், புதுசாக (போலிசாராலே) வெட்டப்பட்ட சந்தனக்கட்டைகளுடன், வெவ்வேறு இடங்களில் சுடப்பட்டிருக்க வேண்டுமா? அவர்களின் ஆயுதங்கள் என்ற பெயரில் சில கத்திகள், துப்பாக்கிள் அங்கு சிதற விடப்பட்டிருக்க வேண்டுமா? அவர்களால் தாக்கப்பட்டதாய் சில காவலர்கள் போலிக்காயங்களுடன் ஆஸ்பத்திரியில் “அனுமதிக்கப்பட்டிருக்க்க” வேண்டுமா? அப்படி நடந்திருந்தால் ஒருவேளை இவ்வளவு தீவிரமான மீடியா கவனமும் பரபரப்பும் ஏற்பட்டிருக்காதோ?

 இந்த என்கவுண்டரின் சிறப்பே இது நம்மை எளிதாக கடந்து செல்ல அனுமதிக்காதபடி கொடூரமாக நடந்துள்ளது என்பது. நம்மைச் சுற்றி இன்னும் நாசூக்காய், சாமர்த்தியமாய் திட்டமிட்ட என்கவுண்டர்கள் நடக்கின்றன. அவை சரியாக களம் அமைக்கப்பட்டு நடிக்கப்பட்டதாலே போதிய மீடியா கவனம் பெறவில்லையோ?

அடிப்படையில் நாம் எல்லாவகை போலீஸ் சூடுகளையும் கடுமையாய் விமர்சித்து எதிர்க்க வேண்டும். நம்பத்தகுந்தபடியாய் சித்தரிக்கப்படுகிற என்கவுண்டர்களையும் தான். என்கவுண்டர் என்பதே போலி எனத் தெரிந்தும் கூட நாம் நம் பாசாங்கை அடித்து நொறுக்கும் இந்த வகையான வெளிப்படை என்கவுண்டர்களை மட்டும் வேறுவழியில்லாமல் எதிர்த்து கொந்தளிப்பது எந்த வகையில் நியாயம்? இது போன்று மோசமாக செட் செய்யப்பட்ட மற்றொரு என்கவுண்டர் நடப்பது வரை மீண்டும் கண்மூடி இருக்கப் போகிறோமா?