எனக்கு மிகவும் பிடித்த இயக்குநர் ஸ்டான்லி குப்ரிக். இயக்குநர் ராம் தான் அவரை எனக்கு அறிமுகம் செய்தார். Full Metal Jacket அவரது கணினியில் ஒரு இரவில் பார்த்தது நினைவில் இருக்கிறது. பிறகு சிடியில் அவரது லோலிட்டா, Eyes Wide Shut, A Clockwork Orange பார்த்தேன். Clockwork Orange அப்போது ரொம்பவும் பிடித்திருந்தது. அந்த பாணியில் ஒரு நாவல் எழுத வேண்டும் என்று கூட ஆசைப்பட்டேன். The Shining ஒரு அபாரமான படம். Eyes Wide Shut ஒருவித புதிர்மை கொண்ட அழகான படம். அண்மையில் டிவியில் திரும்பப் பார்த்தேன். என்ன ஒரு அழகான படம். பார்க்கப் பார்க்க புது விசயங்களைத் திறந்து காட்டியபடி இருக்கும் (வழவழப்பான பெண்ணுடல்களை மட்டும் சொல்லவில்லை.)
ஒருவித ஒழுக்கவியலும் அதை மீறிச்செல்கிற எதிர்மனமும் ஒரே சமயம் அவரிடம் உண்டு. படம் ஆரம்பிக்கும் போது ஒழுக்கத்தின் எதிர் திசையில் சென்று விட்டு கிளைமேக்ஸில் கிறித்துவ ஒழுக்கம், பாரம்பரிய குடும்ப அமைப்பின் அமைதிக்கு திரும்பி விடுவார். ஆனால் இந்த நுட்பமான அரசியலை, எப்போது எந்த குப்ரிக் நம்மிடம் வருகிறார் என்பதை நமக்கு சுலபத்தில் புலப்படாதவாறு நுட்பமாய் செய்து விடுவார். அவர் எந்த பக்கம் ஆதரிக்கிறார் என்பதையே பல சமயம் கண்டுபிடிக்க முடியாது. அதுதான் என்னை அவரிடத்து மிகவும் வசீகரிக்கிறதோ என்னமோ.
கருத்துகள்