அணித்தலைவராக தன் முதல் ஆட்டத்தில் ஷிக்கர் தவனின் தலைமை, செயல்பாடு எப்படி?
அகல விளிம்பு தொப்பியை மாட்டிக் கொண்டு ஜாலியாக சிரித்தபடி தோன்றினார். களத்தடுப்பாளர்கள் மெத்தனம் காட்டினாலோ, கவனம் சிதறினாலோ துள்ளிக்குதித்து கைகளை உதறி தன் கோபத்தைக் காட்டவில்லை. “மிக்கி மௌஸ்” கோலி தொடரில் டொனால்ட் டக்கைப் போல என்றால் தவன் மிக்கி மௌஸைப் போல.
தவனின் களத்தடுப்பு அமைப்பைப் பொறுத்தமட்டில் சற்று எதிர்மறையாக இருந்தது என வர்ணனையாளர்கள் அபிப்ராயப்பட்டனர். எனக்கு முந்தைய தோனி ஸ்டைல் கள அமைப்புகளை நினைவுபடுத்தியது. ஒருநாள் ஆட்டத்தில் குறைவான ரிஸ்க் எடுத்து பந்து வீசுவதே உகந்தது, மட்டையாட்டத்தினால் தான் ஒருநாள் போட்டிகளை வெல்ல முடியும் என தவன் நம்புகிறார். ஒருவேளை தோனிக்கு அடுத்ததாக கோலிக்குப் பதிலாக தவன் தலைவராக தேர்வாகி இருந்தால் சுவாரஸ்யமாக இருந்திருக்கும்.
தவனுக்கு அளிக்கப்பட்ட முக்கிய கடமை எப்படியாவது குல்தீப், சஹலை திரும்ப நல்ல ஆட்டநிலைக்கு கொண்டு வருவது, ஹர்த்திக்கை முடிந்த அளவுக்கு வீச வைப்பது - இரண்டையும் முயன்றார். சாஹல் விக்கெட் எடுப்பதற்காக முழு பத்து ஓவர்களும் கொடுத்தார். குல்தீப் 2 விக்கெட்டுகள் எடுத்து செட்டில் ஆகும் வரை தொடர்ந்து ஓவர்கள் கொடுத்தது, அவர் சகஜமானதும், சாஹலை அவரிடத்தில் கொண்டு வந்தது, குரனால் பாண்டியாவை தொடர்ந்து நடுவே வீச வைத்தது, இறுதி ஓவர்களுக்கு ஹர்த்திக் பாண்டியாவை கொண்டு வந்தது என நிறைய விசயங்கள் தோனியை நினைவுபடுத்தின. இதுவே கோலி என்றால் விக்கெட் எடுக்க வேண்டிய நேரத்தில் குரனாலை கொண்டு வந்திருப்பார், குல்தீப்பை ரொம்ப லேட்டாக எடுத்து வந்திருப்பார். 10-20 ஓவர்களுக்குள் ஹர்திக்கையும், தீபக் சஹரையும் அதிகம் வீச வைத்திருப்பார். இந்த தலைகீழாக்க குழப்பங்கள் இல்லாத எளிமையான பாணி தவனுடையது. அதனால் தான் அவர் தோனியை நிறைய நினைவுபடுத்துகிறார். தோனியின் எதிர்பாராமைகள், சுழலர்களை அறிவுரைத்து, மட்டையாளர்கள் எங்கு அடிப்பார்கள் என கணித்து வழிடத்துவதும் சாமர்த்தியம் தான் மிஸ்ஸிங்.
கருத்துகள்