எதிரியை யுக்திபூர்வமாகக் கையாள்வது என்று சொல்வார்கள். இதுவரைக்கும் பாஜகவை பல கிறிஸ்துவ சிறுபான்மை நிறுவனங்கள் அவ்வாறுதான் நடத்தி வந்தார்கள் என்பது என் அவதானிப்பு. தொடர்ந்து கிறிஸ்துவ சிறுபான்மை நிறுவனங்களில் படித்தும் பணியாற்றியும் வந்தவன் எனும் நிலையில் நான் இதை அருகில் இருந்து கவனித்திருக்கிறேன் - இரட்டை கோபுரத் தாக்குதல் நடந்தபோது என்
வகுப்பில் அமெரிக்காவில் பலியானவர்களுக்காக பிரார்த்தனை பண்ணினார்கள். எதுக்குடா அவங்களுக்காக நீங்க பண்றீங்க என யோசித்தபோதே அப்போதிருந்த அரசியல் விளங்கியது: அப்போது உலகம் முழுக்க கிறிஸ்துவர்களில் ஒரு பகுதியினர் யூத ஆதரவு, இஸ்லாமிய எதிர்ப்பு எனும் வெளியுறவு யுக்தியை மதசார்பாக வகுத்துக் கொண்டனர். பாஜக ஆட்சிக்கு வந்து இரண்டாவது முறை ஒன்றியத்தில் தொடர்ந்து வென்றபோது பல கிறிஸ்துவ நிறுவனங்கள் வெளிப்படையாகவே பாஜக ஆதரவு என நிலைப்பாடு எடுத்தன. இந்துத்துவாவை எதிர்ப்பது அரசை எதிர்ப்பதாகிவிடும், சிறுபான்மை அரசியலைக் கூடப் பேசக் கூடாது என்றே அவர்கள் மறைமுக தணிக்கையை கல்லூரி, பள்ளிகளில் நடைமுறைப்படுத்தினர். இது பயத்தினால் அல்ல, பாஜகவின் கூட்டு சக்தியாகத் தாம் மாற வேண்டும், இந்துத்துவாவின் கார்ப்பரேட் ஆதரவைப் பயன்படுத்த வேண்டும் எனும் ஆசையினாலே தோன்றியது. கேரளாவில் பல கிறிஸ்துவர்கள் வெளிப்படையாக இந்துத்துவா பேச 'கிறிஸ் சங்கிகள்' எனும் பெயரே அவர்களுக்கு வழங்கப்பட்டது. இஸ்மாலியர் மீது தாக்குதல் நடத்தப்படும்போது வாயை மூடிக்கொண்டு வேறு திசை பார்த்து நிற்பது அவர்கள் வழக்கமாகியது. கிறிஸ் சங்கிகளுக்குப் பாஜகவில் இருந்து நிதியும் சென்றது. தமிழ்நாடு சற்றே விதிவிலக்காக இருந்தாலும் இங்கும் தவெகவை கொண்டு வருவதில் சில கிறிஸ்துவ நிறுவனங்களில் வெளிப்படையாக வேலை பார்த்தது செய்தித்தாள்களில் வந்தது. இஸ்லாமிய விரோத நிலைப்பாட்டுக்கு கிறிஸ்துவ நிறுவனங்களை பாஜக கொண்டு வந்து விட்டது, சிறுபான்மை மக்களை இரண்டாகப் பிளந்துவிட்டது என நண்பர்கள் என்னிடம் கூறினர். நான் அவர்களைப் பொறுமை காக்கக் கேட்டேன். பாஜகவின் திட்டம் சிறுபான்மையினரை உடைத்து தனித்தனியாக அடிப்பதுதான். அவர்கள் ஒவ்வொருவரிடமாக வருவார்கள். நைசாக நைச்சியமாகப் பேசுவார்கள். ஆனால் மடியில் இருப்பதைப் பிடுங்கி தனிமைப்படுத்துவார்கள். சட்டத்தால், நடைமுறையால் அடிப்பார்கள்.
முதலில் சிறுபான்மை கல்வி நிறுவனங்கள் சம்பாதிக்கும் செயல்படுவதால் வரி செலுத்த வேண்டும் எனச் விதிமுறை போட்டார்கள். அதை எதிர்த்து இவர்கள் நீதிமன்றம் போனார்கள். அடுத்து வெளிநாட்டுப் பங்களிப்பு (ஒழுங்குமுறை) திருத்த மசோதா (FCRA) வருகிறது. இதற்கான நியாயமாக அவர்கள் சொல்வது வெளிநாட்டு நிதியெனும் பெயரில் கறுப்புப் பணம் இந்தியாவில் கொண்டு வரப்படுகிறது என்பது. இதில் ஓரளவுக்கு உண்மையும் உள்ளது என்றாலும் பாஜகவின் நோக்கம் கறுப்புப் பண ஒழிப்பு மட்டுமல்ல, சிறுபான்மையினரின் நிதி ஆதாரங்களைக் கட்டுப்படுத்துவதுதான். தற்போது கிறிஸ்துவ நிறுவனங்களின் கூட்டமைப்பு அமித் ஷாவைச் சந்தித்து தம் கவலைகளைத் தெரிவித்திருக்கிறார்கள். அவர் இது அனைத்து மதங்களுக்குமான மசோதாதான் எனப் போலிச் சமாதானம் சொல்லியிருக்கிறார். இங்கு ஸ்டாலினைச் சந்தித்து உதவி கேட்டிருக்கிறார்கள். ஆனால் மசோதாவைத் தடுக்க முடியாது.
எந்த விசயத்திலும் அரசை எதிர்க்காமல் யுக்தி பூர்வமாக இருந்ததன் விளைவுதான் அவர்களுக்கு எனப் பிரச்சினை உதிக்கும்போது பொதுமக்களின், பிற சிறுபான்மையினரின் ஆதரவு அவர்களுக்குக் கிடைக்காமல் போயிருப்பது.
மற்றொரு காரணம் மதத்தைப் பரப்புவது, பொதுச்சேவை செய்வது எனும் பெயரில் நடத்தப்படும் நிறுவனங்கள் பெரும் கார்ப்பரேட்டுகளாகி விட்டன. அவர்களுடைய வரவுசெலவில் தில்லுமுல்லு நடப்பதாகப் புகார்கள் வருகின்றன. கல்லூரி, பல்கலைகளில் இடம் பெற லஞ்சம் வாங்குகிறார்கள். சில பாதிரியார்கள் தனிப்பட்ட முறையில் உறவினர்கள் பெயரில் நூற்றுக்கணக்கான கோடிகளுக்கு சொத்து வாங்கிப் போடுகிறார்கள். கடந்த ஆண்டு நான் கோவை சென்றிருந்தபோது ஒரு கேரளாவைச் சேர்ந்த விரிவுரையாளரிடம் பேசினேன். அவர் தன் வீட்டருகே உள்ள நூறு கோடி சொத்தை ஒரு கத்தோலிக்கச் சாமியார் வந்து 'ஹாட் கேஷ்' கொடுத்து வாங்கிப் போனதாகச் சொன்னார். எளிய கடவுளின் பிள்ளைகளாக இருக்க வேண்டியவர்களுக்கு எதற்கு இவ்வளவு சொத்து? எதற்கு வெளிநாட்டு கார்? ஏன் தாய்லாந்துக்கு உல்லாசப் பயணம்? இதே போல, இயற்கைப் பேரிடர் வரும்போது சில என்.ஜி.ஓக்கள் வெளிநாட்டில் இருந்து பெரும் தொகையை வாங்கி அப்படியே முழுங்கி விடுகிறார்கள்.
இதையெல்லாம் பார்க்கும் பொதுமக்களுக்கு எரிச்சல் வராதா? வரும். அதுவும் இவர்களைத் தனிமைப்படுத்தி இருக்கிறது.
நீதியற்ற யுக்தியும் கிறிஸ் சங்கித்தனமும் கறுப்புப் பணமும் முறையற்ற சம்பாதித்தியமுமாக இருக்கும்போது பாஜகவின் இந்த மசோதாவை எதிர்க்கும் அற வலிமையை இழந்து விடுகிறார்கள். தொண்டு செய்யும் மனநிலை கொண்ட அசல் சாமியார்களும் நீதிவான்களும் உண்டு. அவர்கள்தாம் இந்த சுயநலக் கார்ப்பரேட் சிறுபான்மை நிறுவனங்களுக்கும் பாஜகவுக்கும் இடையில் அதிகமாகச் சிக்கி பாதிப்படைவார்கள்.
கருத்துகள்