கொஞ்சமே கொஞ்சம் தாமதமாக!

இங்கிலாந்துடனான நான்காவது டெஸ்ட் ஆட்ட்த்தின் முதல் நாளான இன்று எல்லா மட்டையாளர்களை விடவும் எட்டாவதாக களமிறங்கிய அஷ்வின் தான் மிக சுலபமாக பந்து வீச்சை எதிர்கொண்டு நாற்பது சொச்சம் அடித்தார். அவர் ஆட்டத்தில் ஒரு ஸ்டைல், லாவகம், சிரமமின்மை தெரிந்தது. அதற்கு முக்கிய காரணம் அஷ்வின் அரை நொடி தாமதமாக பந்தை அடிப்பது.

மட்டையாட்டத்தின் அடிப்படை நுட்பம் பந்து விழும் அரைநொடி முன் தயாராவது, அதே பந்தை சற்றே, மிக சற்றே தாமதமாக அடிப்பது. ஸ்விங் ஆகும் பந்தை ஆட இது தான் சிறந்த முறை. அஷ்வினைப் பார்க்கையில் இதே போல் மணிக்கட்டு வளைத்து அசருதீன் ஆடுவது நினைவு வருகிறது. எவ்வளவு சிரமமான ஆடுதளத்திலும் அசரூதீன் சுணங்காமல் சரளமாக ஆடுவார். பவுன்ஸ் மட்டுமே அவரது ஒரே பிரச்சனை. மற்றபடி பந்தை தாமதமாக மீட் பண்ணி டைமிங்குடன் ஆடுவதில் கில்லாடி.

இன்று பிற மட்டையாளர்கள் பந்தை ஒன்று வேகமாய் அல்லது ரொம்ப தாமதமாய் மீட் பண்ணினார்கள். இங்கிலாந்து மட்டையாளர்களும் அஷ்வினை போல் 0.5 நொடி தாமதமாக தான் பந்தை தொடுகிறார்கள். அதனால் தான் அவர்கள் நம் வீரர்களைப் போல் மட்டையாடுகையில் பதறுவதில்லை. 

இந்தியாவில் சுழல் பந்தை இது போல் நம் வீரர்கள் சற்றே தாமதித்து மீட் செய்து ஆடுவார்கள். வெளிநாட்டு வீரர்கள் அவசரமாய் அடித்து சுழலையும் பவுன்ஸையும் சமாளிக்க முடியாமல் அவுட் ஆவார்கள். சுழலையும் சிறப்பாய் ஆடும் சூட்சுமமும் இப்படி மிக மிக கொஞ்சமாய் தாமதித்து பந்தை அடிப்பது தான். T20 ஆட்டம் இந்த கலைநுட்பத்தை நம் வீரர்களிடம் இருந்து பறித்து விட்டது. பந்து விழும் முன்னே அதை சந்திக்கும் ஒரு வேகத்துடன் நம் மட்டையாளர்கள் முன்னேறுகிறார்கள். தடுத்தாடும் போதும் இந்த ஒரு வேகமும் முனைப்பும் உள்ளது. இது தட்டையான ஆடுதளத்தில் ஐம்பது அல்லது 20 ஓவர் ஆட்டங்களில் பவுண்டரி ஷாட்கள் ஆட உதவும். ஆனால் இதுவே பந்து ஸ்விங் ஆகும் போது கடைசி கட்டத்தில் ஷாட்டை மாற்ற அவர்களை அனுமதிக்காது.