ராகுலின் சந்தர்ப்பவாதம்

ராகுல் காந்தி தேர்தல் ஆணைய முறைகேடுகளைக் குறித்து பி.பி.டியுடன் தன் வழக்கமான காக்கி கால்சராய், வெள்ளை டிஷர்ட் சகிதம் ஏதோ பயங்கர கண்டுபிடிப்பை வெளிப்படுத்துகிற தோரணையில் பேசிய பத்திரிகையாளர் சந்திப்பைப் பார்த்தேன். மோடி-கியானேஷ் குமார் ஜோடியைக் கிழித்துத் தொங்கப் போட்டுவிட்டார். அதே நேரம் ராகுலுக்கே உரித்தான சந்தர்ப்பவாதமும் இருந்தது: பாராளுமன்ற தேர்தலிலும் வட இந்திய மாநிலத் தேர்தல்களிலும் தேர்தல் ஆணையம் செய்த முறைகேடுகளைச் சொன்னவர் கவனமாக மே. வங்கம், தமிழ்நாடு, கேரளா ஆகியவற்றைத் தவிர்த்துவிட்டார். ஏனெனில்,
1) கேரளாவில் அவரது கட்சி வென்றுவிட்டது.
2) தமிழ்நாட்டில் திமுக தன்னைத் தாண்டிச் செல்கிறது, இந்தியா கூட்டணியில் அதிக மைலேஜ் தேடுகிறது என அவருக்கு ஆரம்பத்தில் இருந்தே ஏற்பட்டிருந்த அதிருப்தி கடந்த தேர்தலில் விஸ்வரூபம் எடுத்து தேர்தல் முடிவுக்கு தன் கூட்டணிக்கு எதிராகப் போனதும் திமுகவை ஒழிப்பதே கூட்டணியைக் காப்பாற்றுவதைவிட முக்கியம் எனக் கருதி தவெகவுடன் அவசரக் கூட்டணி அமைத்து மாட்டிக் கொண்டார். தவெக உடல் காங்கிரஸுக்கு உயிர் பாஜகவுக்கு என்று முடிவெடுத்ததில் இப்போது அவர் தமிழ்நாட்டைப் பற்றிப் பேசுவதையே தவிர்க்கிறார்.
3) மே. வங்கத்திலும் மம்தாவை விட கைக்கடக்கமான தலைவர்களையே அவர் விரும்புவதாலும் மம்தா கட்சியினர் மூன்றாவது அணியை அமைக்க முயல்வதாலும் அவருக்கு அங்கு பாஜக வென்றதில் மகிழ்ச்சியே.

ஒரு மிகப்பெரிய மோசடியை, தேசத் துரோகத்தை, ஜனநாயகப் படுகொலையைப் பற்றிப் பேசும்போதே இவ்வளவு சந்தர்ப்பவாத அரசியல் பண்ணும் இவர் எதிர்காலத்தில் பிரதமரானால் தன்னுடன் உடன்பாடாக இல்லாத மாநிலங்கள் இந்தியாவிலே இல்லை என்னும்படியாகத்தான் நடந்துகொள்வார் என நினைக்கிறேன். ஆனால் கரப்பான் பூச்சிக் கட்சியின் அபிஜீத் தீப்கேவைப் பாருங்கள். ஊடகச் சந்திப்பில் அவர் மம்தா பேனர்ஜி, ஸ்டாலின், பினராயி விஜயன் ஆகிய முன்னாள் முதல்வர்கள் ஒருமித்து தோற்கடிக்கப்பட்டதில் சூழ்ச்சி உள்ளது, அவை தற்செயலானவை அல்ல என்றார். இப்படி ஒருவர் சந்தர்ப்பவாதியாகவும், இன்னொருவர் நேர்மையானவராகவும் வெளிப்பட்டார்.