கரப்பான் பூச்சிப் போராட்டங்கள் இரு கூறுகளாகப் பிரிந்திருக்கின்றன. ஒரு பக்கம் காங்கிரஸுடன் லெனினிய கம்யூனிஸ்ட் மாணவர் அமைப்பின் நேஹா போரா; இன்னொரு பக்கம் ஆம் ஆத்மி பின்னணி கொண்ட தீப்கே, ரங்கா போன்றோர். ராகுல் காந்தி ஆம் ஆத்மி பின்னணி கொண்ட கரப்பான் பூச்சித் தலைவர்களை பாஜகவுக்கு எதிர்க்கட்சியாக, காங்கிரஸுக்குப் பதிலியாக முன்வைக்க சில சக்திகள் முயல்வதாகச் சந்தேகப்படுகிறார் (தமிழ்நாட்டில் திமுக இரு தரப்பு கரப்பான்களையும் ஆதரிக்கிறது, ராகுலுக்குச் சார்பாகப் பேசாமல் இருக்கிறது). இப்போது போராட்டம் யார் மூன்றாவது அணி என்பதில்தான்.
இன்னொரு பக்கம், கடந்த முறை விமர்சகர்கள் கேட்ட கேள்விக்கு ஓரளவுக்கு விடை கிடைத்துவிட்டது - முதல் நிலைப் போராட்டத்தின்போது பாஜக அரசு எப்படி தீப்கே, நேஹா போரா உள்ளிட்டோரை ஜந்தர் மந்தரில் தொடர்ச்சியாகப் போராட அனுமதித்தது? அப்போது பாஜகவுக்கு இப்போராட்டங்களைத் தமக்குச் சாதமாகப் பயன்படுத்திக் கட்டுப்படுத்தலாம் என ஒரு உத்தேசம் இருந்திருக்க வேண்டும். அவர்கள் கரப்பான் பூச்சிகளைக் குறைத்து மதிப்பிட்டிருக்க வாய்ப்பு மிக மிகக் குறைவே. ஆனால் வடமாநில கல்லூரிகளின் மாணவர் அமைப்பினர் தில்லியில் மாணவர்கள் தாக்கப்பட்டதைக் கண்டு வெகுண்டெழுந்ததை, இந்திய மத்திய வர்க்கம் அதை ஆதரித்ததை பாஜக தலைமை எதிர்பார்த்திருக்க மாட்டார்கள். இம்முறை போராட்டம் ஆரம்பிக்கும் முன்பே போராட்டக் களங்கள், போராட்டக்காரர்கள் வரும் மார்க்கங்களை எல்லாவற்றையும் அடைத்ததுடன் துவக்கத்திலேயே கரப்பான் பூச்சிகளைக் கொத்துக் கொத்தாகக் கைதும் பண்ணினார்கள். இன்னும் ஒரு படி மேலே சென்று அப்பாவிகள், ஊடகக்காரர்கள், எம்.பிக்கள் எல்லாரையும் பிடித்துப் போய் தாக்கவும் செய்தார்கள். தில்லி போலிசார் எவ்வளவு மரமண்டையர் எனில் அவர்களுக்கு எம்.பிக்களின் முகம் கூடத் தெரியவில்லை எனப் பாருங்கள். டிவியில் செய்தி கூடப் பார்ப்பதில்லை போல. சாப்பிடுவது, தூங்குவது, வேலைக்கு வருவதைத் தவிர துண்டுக் காகிதம் கூட வாசிக்காத ஒருவித விலங்குகள். எது எப்படியோ பாஜக தலைமை வெற்றிகரமாக போராட்டங்களை ஒடுக்கிவிட்டார்கள் என்பது தெளிவாகத் தெரிகிறது. அடுத்ததாக, அரசைக் கவிழ்க்க முயற்சி என அவர்களுடைய இரண்டாம் மட்ட தலைவர்கள் ஊடகங்களில் ஒப்பாரி வைக்கத் தொடங்கிவிட்டார்கள். அப்படியே இந்திரா காந்தி 1970களில் செய்ததை எல்லாம் போலச் செய்கிறார்கள்.
தீப்கேயும் நேஹாவும் அடுத்து செய்ய வேண்டியது உண்ணாநிலைப் போராட்டம் இருப்பது. இந்தியா முழுக்க மாணவர்களை கிடைத்த இடங்களில் எல்லாம் உண்ணாநிலைப் போராட்டம் செய்யச் சொல்வது. கைது பண்ணுவார்கள். சிறையிலும் விரதத்தைத் தொடர வேண்டும். காங்கிரஸ் சார்பில் யாராவது ஒரு வயதான தலைவரை உண்ணாநிலைப் போராட்டம் செய்யக் கேட்க வேண்டும்.
இது மட்டுமே அரசை நெருக்கடியில் தள்ள முடியும். இல்லாவிட்டால் கரப்பான் பூச்சிகளின் இரண்டாம் கட்டப் போராடங்கள் பிசுபிசுத்துவிடும்.
கருத்துகள்