(பேஸ்புக்கில் சரவண சுப்பிரமணியன் எழுதிய பதிவில் இருந்து)
54/2019
தொண்ணூறுகளின் தமிழ் சினிமா
ஆர்.அபிலாஷ்
கிழக்கு பதிப்பகம்
120 பக்கங்கள்
உயிர்மை இதழ்களில் அபிலாஷின் கிரிக்கெட், கிரிக்கெட் அல்லாத கட்டுரைகளை வாசித்ததுண்டு. கிரிக்கெட் விளையாட்டை நுட்பமாக விமர்சித்து காட்சிப்படுத்தும் அவரது கட்டுரைகளை வாசித்து வியந்தது உண்டு.
கிரிக்கெட்டை ரசிக்காத நண்பர்களால் கேலி செய்யப்பட்ட தருணங்களில் ஏற்பட்ட குற்ற உணர்வை விலக்கியவை அவை.
பொருளாதாரம், பொழுதுபோக்கு, அறிவியல் உள்ளிட்ட பல தளங்களில் ஏற்பட்ட பெரு மாற்றங்கள் 90 களுக்கு உரியவை. சினிமாவும் அதற்கு விதிவிலக்கில்லை.
புத்தம் புதிய கதாநாயகர்கள், இயக்குனர்கள், இசைக் கலைஞர்களுடன் திரை மொழியை பெரிதும் மாற்றி அமைத்த காலகட்டங்கள் அவை.
10 கட்டுரைகளின் தொகுப்பு இந்நூல். ஒவ்வொரு கட்டுரையிலும் அபிலாஷ் தொண்ணூறுகளின் தமிழ் படங்களை அக்குவேறு ஆணிவேறாக அலசுகிறார்.
பார்த்து ரசித்த படங்களை நினைவு கூரவும், நுட்பங்களை அறிந்து வியக்கவும் வைப்பவை இக்கட்டுரைகள்.
இக்கட்டுரைகள் பேசும் படங்களின் தொடர்புடைய இயக்குனர்கள் இவற்றை வாசிக்க நேரிடின், தமது படைப்புகளின் ஒட்டுமொத்த பரிமாணங்களை அவர்களே முழுமையாக அறிந்து வியக்க நேரிடும்.
கருத்துகள்